Çempionlar Liqasının 3-cü təsnifat mərhələsi çərçivəsində baş tutan ''Fənərbaxça'' - ''Feyenoord'' oyununda yaşanan qanqaraldıcı qalmaqalla bağlı yeni xəbər var.

Bu komandaların Rotterdamdakı ilk oyununda meydan sahibləri 2:1 üstün olmuşdusa, cavab oyununda ''Fənər'' 5:2 qalib gələrək mərhələni adlamışdı. Niderland mətbuatının yazdığına inansaq, İstanbuldakı cavab matçının gedişində 3 ''Fənərbaxça'' azarkeşi ''Çobani Stadionu''ndakı beton sütunlardan birini sökərək qonaqların yer aldığı tribunaya tərəf atıblar. Bu sütun həmin an yerli fanatlardan şikayət etmək üçün polislə söhbət edən bir azarkeşin düz üzərinə düşüb. Yaralanan ''Feyenoord'' fanatının şiddətli beyin sarsıntısı keçirdiyi və qolunun qırıldığı qeyd olunub.

Onun sonrakı iki ay ərzində işə çıxa, parlaq işığa tərəf baxa və maşın sürə bilmədiyi, eləcə də şiddətli baş ağrılarından əziyyət çəkdiyi bildirib. Qeyd olunur ki, ''Fənər''in həmin 3 azarkeşi hələ də həbs olunmayıb. Ancaq bu günlərdə olayla bağlı telefonla çəkilmiş yeni görüntülər ortaya çıxıb.

Niderland televiziyasında yayınlanan görüntülərin ardından polis hərəkətə keçib. Həmin 3 azarkeşin cinayətə təşəbbüsdə günahlandırıldığı və onların axtarışının davam etdirildiyi bildirilir.