MHL üzrə ixtisaslaşan insayder Elliott Fridmanın yaydığı xəbərə görə, Kirill Kaprizov “Minnesota”da qarşıdakı 8 ilin hər birində ortalama 17 milyon dollar alacaq.

"Football-plus.az" xəbər verir ki, müqavilə təkcə orta illik maaşa yox, həm də ümumi məbləğə görə MHL tarixinə düşdü.

28 yaşlı rusiyalı hokkeyçi müqavilə müddəti ərzində 136 milyon dollar qazanacaq. Bu isə Aleksandr Oveçkin (124 milyon), Leon Drayzaytl (112 milyon) və bütün başqa hokkeyçilər ilə müqayisədə daha çoxdu. Kirillin müqaviləsi 2026/27 mövsümündən qüvvəyə minəcək və 2033/34 mövsümünün sonuna qədər qüvvədə olacaq. Buna qədər MHL rekordu “Edmonton”un hücumçusu Leon Drayzaytla məxsus idi – o, 2024-cü ilin sentyabrında “neftçilər”lə ümumi dəyəri 112 milyon olan 8 illik müqavilə bağlamışdı.

Müqavilənin şərtləri hələ tam açıqlanmayıb: Kaprizovun mövsümlərin hər birində nə qədər qazanacağı, həmçinin imzahaqqı bonusu bilinmir. Təbii ki, rusiyalı ulduz bu məbləğin hamısını almayacaq. “Minnesota”da maaşa görə vergi 40,38 faiz təşkil edir. Bunu da nəzərə alsaq, Kirill tər-təmiz 81,1 milyon dollar alacaq – ildə orta hesabla 10,13 milyon.

Bu müqavilə ilə bağlı diqqəti cəlb edən məqam başqadı. Kaprizov cəmi üç həftə əvvəl “Minnesota”nın oxşar təklifini rədd etmişdi. Onda klub 8 illik müqavilə və hər il üçün 16 milyon dollar təklif edirdi. Görəsən, üç həftə ərzində nə dəyişdi ki? Faktiki heç nə. Klub hansısa başqa gurultulu transfer etməyib ki, rusiyalının məhz buna görə mövqeyini dəyişdiyini deyək.

Çox güman, səbəb başqadı. Hokkeyçinin agentləri həm bazardakı durumu, həm də “Minnesota” rəhbərliyinin imkanlarını araşdırıb. Və bundan sonra belə fikrə gəliblər ki, maksimum elə bu məbləğdə müqaviləyə ümid edə bilərlər. Aydın məsələdi ki, Kaprizov özü də komandasını dəyişmək istəməyib.

O da məlumdu ki, Kaprizov MHL-in ən yüksək ödənişli hokkeyçisi statusunu uzun müddət daşıya bilməyəvək. Tezliklə kanadalı Konnor Makdevid bu statusa yiyələnəcək. Onun “Edmonton”la müqaviləsinin müddəti 2025/26 mövsümünün sonunda bitəcək. “Neftçilər” ulduz hokkeyçi ilə yeni müqavilənin şərtlərini hələ razılaşdırmayıb. 8 il əvvəl “Edmonton” ona illik 12,5 milyon dollar maaş kəsmişdisə, deməli, bu dəfə daha yaxşı şərtlərlə müqavilə təklif edəcək. Mövsümlərarası dövrdə maaş tavanının bir qədər də qalxdığını nəzərə alsaq, başqa ssenari ola bilməz.

Yeri gəlmişkən...
Kaprizov MHL-də keçirdiyi 5 mövsüm ərzində 319 oyunda 386 (185+201), Stenli kubokunda keçirdiyi 25 oyunda 21 (15+6) xal toplayıb. O, “Minnesota”nın həm bir mövsüm ərzində qazanılan xal (2021/22 mövsümündə 108), həm də qol (2021/22 mövsümündə 47) sayında rekordçusudu. Kaprizov həm də klub tarixində bir neçə mövsümdə (2021/22, 2022/23, 2023/24) 40 qol vuran yeganə hokkeyçidi.