Ayxan Abbasov əsas yığmaya gedəndən sonra U-21-in yeni baş məşqçisi Rəşad Əyyubov oldu.

Əyyubovun əsas millidə köməkçi məşqçi vəzifəsinə təyin olunması ilə bağlı qərar nə qədər qəribə idisə, U-21-in “sükanı arxasına” keçməsi də bir o qədər qəribədi. Əlbəttə, məqsədimiz gənc mütəxəssisin karyerası üzərində qara bulud rolunu oynamaq, onu ruhdan salmaq deyil. Azı ona görə ki, biz də ümid millisinin uğurlarından ümidlənmək, "Futbol+" oxucusuna parlaq nəticələri çatdırmaq arzusundayıq. Ancaq hər bir idman sahəsində olduğu kimi, nə pul hər şeyin çarəsidi, nə də istək və əzmkarlıq. Təcrübə bu işin olmazsa olmazıdı ki, Rəşad bəyin nə dərəcədə təcrübəli olduğu böyük sual altındadı.

Bəli, o, futbolçu karyerası ərzində Ukraynada "Çernomorets" və "Metallurq", ölkəmizdə tarixə qovuşan "Simurq" və "Xəzər Lənkəran"la yanaşı, "Kəpəz", "Qəbələ", "Sumqayıt", "Neftçi", "Sabah" və "Zirə" kimi klublarda top qovub. Ukraynanın U-17 millisinin üzvü olan futbolçu həm də Azərbaycanın U-17, U-19, U-21 və əsas yığmalarında çıxış edib. Ancaq Əyyubovun məşqçi karyerası futbolçu karyerası qədər zəngin deyil. "Sabah"ın U-19, əvəzedici və əsas komandasında məşqçi fəaliyyətiylə məşğul olan Rəşad bəy yığmanın sabiq baş məşqçisi Fernando Santuşun köməkçisi təyin edilib.

Sonra başverənlərdən də xəbərdarsız. Təbii ki, 32 yaşı olan mütəxəssisin qısa müddətdə bu zirvələrə yüksəlməsi ağla sual gətirməyə bilməz. Hər halda, ən vacib məqam onun hansı uğurlarına görə U-21 yığmasına təyin olunduğunu düşünəndə ağla nəsə gəlməməsidi. Rəşad bəyin nə "Sabah"dakı karyerası ürəkaçan səviyyədə olub, nə də yığmadakı. Hələ onu demirik ki, U-21-in baş məşqçisi ola biləcək xeyli sayda daha təcrübəli mütəxəssis var. Özü də işsizdilər.

İndi bizə Rəşad Əyyubovun fəaliyyətini daha yaxından izləmək qalır. Axı U-21 Avropa çempionatının seçmə mərhələsi çərçivəsində Çexiya və Şotlandiya yığmalarına qarşı oynayacaq. Belədə mütəxəssisin "qab"ının dolu ya boş olduğu da görünəcək, AFFA-nın düzgün seçim edib-etmədiyi də...

Hələ ki hadisələrin axarı ümid yığmasının gələcəyi ilə bağlı müsbət fikirlər səsləndirməyə imkan vermir!

KƏNAN BAHADIR