Şənbə günü Türkiyə çempionatının 8-ci turunda İstanbul derbisi baş tutdu. ''Qalatasaray'' doğma meydanda ''Beşiktaş''la oyunda favorit sayılsa da, qalib gələ bilmədi (1:1).

"Football-plus.az" xəbər verir ki, qonaqların heyətində Temmi Abrahamın vurduğu qola meydan sahiblərində İlkay Gündoğan cavab verdi. ''Cim-Bom''un hələ ilk yarıda Davinson Sançesin qırmızı vərəqə almasından sonra azlıqda qaldığını və fasiləyə geridə yollandığını nəzərə alsaq, bu nəticəni meydan sahibləri üçün qənaətbəxş saymaq olar.

Beləliklə Okan Burukun kollektivi bu mövsüm 8-ci turda ilk dəfə xal itirdi və ''Fənərbaxça''nın rekordunu təkrarlaya bilmədi. ''Fənər'' 2023/24-də ilk 10 turdan qələbə ilə ayrılmışdı. Bundan başqa ''sarı-qırmızılar''ın superliqada 15 oyunluq qələbə seriyası başa çatdı. Komanda daxili çempionatda sonuncu dəfə ötən mövsümün 29-cu turunda yenə də ''Beşiktaş''la derbidə (1:2) xal itirmişdi.

Yeri gəlmişkən, Türkiyə mətbuatında derbinin təkrar edilə biləcəyi ilə bağlı iddialar yayılıb. Məsələ burasındadı ki, ''Beşiktaş'' əvəzetmələri həyata keçirərkən oyunu 4 dəfə dayandırdı. Klublara 5 əvəzetmə haqqı verilsə də, reqlamentə görə bu əvəzetmələr yalnız 3 dəfəyə həyata keçirilə bilər. ''Qartal'' ikinci hissədə hakimlərin anlaşmazlığı üzündən 4 dəfə evezetmə fasiləsindən yararlandı. 65-ci dəqiqədə bir əvəzetmə həyata keçirildikdən sonra oyun davam etdi. Halbuki qonaqlar həmin anda iki oyunçu dəyişdirmək istəyirdilər. Oyun davam etdikdən təxminən 10 saniyə sonra hakim bunun fərqinə vararaq fitini səsləndirdi. Oyun dayandı və həmin əvəzetməyə icazə verildi.

Reqlamentə görə bu da yanlışdı. Əvəzetməyə görə hakimin oyunu dayandırmaq ixtiyarı yoxdu! Bu epizoda oyundan sonra ''Qalatasaray'' cəbhəsi, eləcə də baş məşqçi Okan Buruk da kəskin reaksiya verdi.

''Qalatasaray'' federasiyaya rəsmən müraciət edəcəyi təqdirdə derbinin yenidən keçirilməsi ehtimalı mövcuddu.