Türkiyə çempionatında 7-ci turun açılış oyununda ''Qalatasaray'' ''Alanyaspor''un qonağı oldu. Son çempion üçün oyun heç də asan keçmədi.

Evdə keçirdiyi son 6 oyunda uduzmayan və bu mövsüm artıq ''Beşiktaş''la (2:0) ''Fənərbaxça''dan (2:2) xallar qoparan ''Alanyaspor'' daha bir İstanbul nəhənginə də ciddi müqavimət göstərdi. ''Cim-Bom'' qalib gələ bildiyi üçün bəxtə və qapıçısı Uğurcan Çakıra minnətdar olmalıdı. Meydan sahibləri 90 dəqiqə ərzində 6 yüz faizlik qol fürsətini boşa verdilər!

''Qalatasaray''ın qapıçısı Uğurcan Çakır matçı 8 seyvlə tamamlayaraq Türkiyə çempionatında şəxsi rekordunu təkrarladı. Oyunda yeganə qolu isə Mauro İkardi vurdu. Argentinalı ulduz 23-cü dəqiqədə yeni transfer Uilfrid Sinqonun gözəl cinah keçidindən sonra etdiyi ötürməni baxımlı daban zərbəsi ilə tora göndərdi. İkardi bu mövsüm 5-ci qolunu vurmaqla bombardirlər yarışında liderliyi ələ keçirdi.

Beləliklə, minimal hesabla qalib gələn və 7 turdan sonra maksimum göstərici ilə turnir cədvəlinə başçılıq edən Okan Burukun komandası birdən-birə iki mühüm göstəriciyə nail oldu. ''Qalatasaray'' tarixində ilk dəfə çempionatda mövsümə ardıcıl 7 qələbə ilə başlamış oldu! Ötən mövsüm ''sarı-qırmızılar'' ilk 6 turda qalib gəlmiş və 7-ci turda evdə ''Kasımpaşa'' ilə oyunda (3:3) xal itirmişdilər.

Bundan başqa ''Qalatasaray'' superliqada səfərdə ardıcıl 32-ci qarşılaşmada qol vurmaqla turnirin yeni rekordunu müəyyənləşdirdi. Komanda səfərdə qola həsrət qaldığı son matçını 2023-cü ilin dekabrın 24-də keçirib. ''Cim-Bom'' həmin vaxt derbidə ''Fənərbaxça'' ilə qolsuz bərabərə qalmışdı.