Çempionlar Liqasında liqa mərhələsinin 2-ci turunun matçlarından sonra həftənin ən yaxşı futbolçusu müəyyənləşib.

Nominantların sırasına Erlinq Holann (Mançester Siti), Kilian Mbappe (Real), Yens-Petter Hauqe (Bude/Qlimt) və Rasmus Höylunn (Napoli) layiq bilinmişdi. Bu oyunçulardan Mbappe “Kayrat”la oyunda het-trik etmiş, Holann “Monako”nun (2:2), Hauqe “Tottenhem”in (2:2), Höylunn isə “Sportinq”in (2:1) qapısına 2 qol vurmuşdu. UEFA-nın rəsmi saytında keçirilən səsvermə nəticəsində Mbappe həftənin ən yaxşı oyunçusu seçilib.

Çempionlar Liqasında 2-ci turun rəmzi komandası da müəyyənləşib. Maraqlıdı ki, həftənin ən yaxşı “11-liy”inə 11 klubun üzvləri düşüb: qapıçı - Uğurcan Çakır (Qalatasaray); müdafiəçilər - Nunu Mendes (PSJ), Erik Dayer (Monako), Federiko Qatti (Yuventus), Denzel Dyumfris (İnter); yarımmüdafiəçilər - Yens-Petter Hauqe (Bude/Qlimt), Marsel Zabitser (Borussiya D), Martin Edeqor (Arsenal), Nikolya Pepe (Vilyarreal); hücumçular – Rasmus Höylunn (Napoli), Kilian Mbappe (Real).