Çempionlar Liqasında qrup mərhələsinin 1-ci turunun oyunlarından sonra həftənin ən yaxşı futbolçusu müəyyənləşib.

Football-plus.az xəbər verir ki, UEFA-nın saytının məlumatında ən baxımlı qolun müəllifi və turun rəmzi komandası da açıqlanıb.

Azarkeşlər arasında keçirilən sorğuda ilk turun ən yaxşı oyunçusu Robert Levandovski seçilib. “Barselona”nın hücumçusu Plzen “Viktoriya”sı ilə matçda (5:1) het-trik etmişdi. 34 yaşlı futbolçu səsvermədə Pyotr Zyelinski (Napoli), Kilian Mbappe (PSJ) və Leroy Saneni (Bavariya) qabaqlayıb.

Turun ən baxımlı qolunun müəllifi Mbappe olub. Onun PSJ – “Yuventus” matçının (2:1) 5-ci dəqiqəsində vurduğu qol daha çox səs toplayıb. Xatırladaq ki, Kilian italyanların qapısından iki top keçirmişdi.
İlk turun rəmzi komandasında “Mançester Siti” 2 oyunçu ilə təmsil olunub. Digər 9 komandanın bir futbolçusu fərqləndirilib: qapıçı - Dominik Livakoviç (Dinamo, Zaqreb); müdafiəçilər - Joao Kanselu, Ruben Diaş (hər ikisi “Mançester Siti”), Alexandro Qrimaldo (Benfika), Lubade Abakar Silla (Brügge);
yarımmüdafiəçilər - Markus Edvards (Sportinq), Pyotr Zyelinski (Napoli), Məhəmməd Kudus (Ayaks); hücumçular - Robert Levandovski (Barselona), Leroy Sane (Bavariya), Maryan Şved (Şaxtyor).