“Hamı “Qarabağ” haqda müsbət fikirdədi” - Arif Əsədov Moskvada 4-cü yeri tutdu
Azərbaycan futbolunun tanınmış veteranı, Avropa və dünya çempionu Arif Əsədov Moskvada keçirilən ənənəvi “Əfsanələr Kuboku”nda iştirak edib.
Turnirdə Rusiya, Serbiya, Türkiyə, Avropa, Asiya və Dünya yığmaları mübarizə aparıb. 55 yaşlı Əsədov Asiya yığmasının heyətində meydana çıxıb. Komanda 3-cü yer uğrunda matçda Dünya yığmasına 7:10 uduzaraq turniri 4-cü pillədə başa vurub. Qalib isə finalda Avropa veteranlarını məğlub edən Rusiya əfsanələri olub.
Arif bəy turnirlə bağlı təəssüratını "Football-plus.az"la bölüşdü:
“Turnir yüksək səviyyədə və dostluq şəraitində keçdi. Mən komandada ən yaşlı oyunçu idim, çünki əsasən 45 yaşadək veteranlar iştirak edirdi. Asiya yığmasında tanışım az idi, amma Rusiya komandasında, demək olar ki, hamını tanıyırdım. Çoxu ilə SSRİ yığmasında birgə oynamışıq. Rusiyada müharibə vəziyyəti heç hiss olunmur. Azərbaycan futbolunun uğurlarından xəbərdardılar. Bu turnirdə ilk dəfə iştirak edirdim. Azərbaycanın adı çəkilir, bu sevindiricidi. Turnir yüksək səviyyədə keçdi. “Qarabağ” haqda da xeyli söhbətlər oldu. Burda demək olar ki, hər kəs “Qarabağ” haqda müsbət fikirdədi”.
MÜZƏFFƏR QULUZADƏ
