Kobud səhvə yol verən hakimdən TFF prezidentinə cavab
Türkiyənin təcrübəli hakimlərindən olan Arda Kardeşler Türkiyə Futbol Federasiyasının prezidenti İbrahim Hacıosmanoğlunun cavabını verib.
Xatırladaq ki, bu ədalət təmsilçisi ötən həftəsonu idarə etdiyi ''Trabzonspor'' - ''Qaziantep'' matçında (1:1) yol verdiyi kobud səhvlə diqqət mərkəzinə düşmüşdü. Oyundan sonra ''Trabzonspor'' prezidenti Ərtuğrul Doğan Kardeşleri sərt sözlərlə tənqid etmiş və onun artıq hakimlikdən getməli olduğuna işarə vurmuşdu. Elə Hacıosmanoğlu da ona dəstək verərək gecə yarısı bir verilişin canlı yayınına qoşulmuş, ''həyatımda belə səhv görməmişdim'' açıqlamasını vermiş və Kardeşlerin cəzalanacağını vurğulamışdı.
Türkiyə mətbuatının yazdığına inansaq, TFF bu hakimdən öz xoşu ilə karyerasını bitirməyi tələb edib. Amma Kardeşler bundan imtina edib. Onun uzun müddət oyunlara təyinat almayacağı gözlənilir. FİFA hakimi statusunda olan və 10 ilə yaxındı, superliqa matçlarına təyinat alan 37 yaşlı Kardeşler ''HT Spor'' kanalının canlı yayınına bağlanaraq bunları deyib:
''Düzdü, həmin epizodda səhvə yol verdim. Amma bu, karyeramdakı ilk səhv deyil. Məni ən çox üzən şey federasiya prezidentinin bu epizodla bağlı ''adi səhv deyil, bilərəkdən atılmış bir addımdı'' ifadəsini işlətməsi oldu. Xaiş edirəm, bu cümlənin altında nə yatdığını, ''bilərəkdən atılmış addım'' dedikdə nəyi nəzərdə tutduğunu ictimaiyyətə açıqlasın. Mən bununla ömrümün sonuna qədər yaşamaq istəmirəm. Hazırda əsas günahkar kimi göstərilirəm. Uzun illərdi, federasiyadan pul qazanıram və Hakimlər Komitəsinə bağlı olaraq çalışıram. Ona görə də bu cür məsələlərə münasibət bildirməyim fərqli cür anlaşıla bilər. Kaş ki, federasiya prezidenti bu açıqlamanı verməmişdən öncə mənim özümlə əlaqə saxlayardı və mənim də ailəmin olduğunu düşünərdi''.
Digər xəbərlər
