Mahir Emreli “Kayzerslautern”in heyətində sonuncu dəfə avqustun 22-də görünüb. Həmin gün “qırmızı iblislər” səfərdə “Elversberq”ə 1:2 uduzub, 72-ci dəqiqədə əvəzlənən həmvətənimiz necə oyun göstəribsə, baş məşqçi Torsten Liberkneht bir daha ona şans vermir. Məncə, hər şey aydındı, cidanı çuvalda gizlətmək olmaz. Son illərdə artıq neçənci dəfə azərbaycanlı futbolçu yad yerdə münasibət problemi yaşayır. Dəlillərim çoxdu, lap çox!

“Kayzerslautern” 4-cü turda – avqustun 31-də “Darmştadt”ı qəbul etdi və 3:1 hesabıyla qələbə qazandı. Bu, yığma fasiləsi ərəfəsindəki son oyun idi. Mahirin yüngül zədəli olduğu haqda bəzi xəbərlər dolaşsa da, həmin oyunun afişasında bununla bağlı qeyd yox idi. Yəni “Kayzer”in zədəliləri kimi Simon Asta, Fabian Hek və Kenni Redondo göstərilmişdi. Zatən Mahirin sentyabrın 5-i və 9-da yığmanın heyətində iki oyuna çıxması da zədə söhbətinin gerçək olmadığını, hücumçu ilə baş məşqçi arasında “soyuq yellərin əsdiyini” göstərirdi. Düşündük ki, yəqin yığma fasiləsindən sonra münasibətlər düzələr. Amma və lakin...

“Kayzerslautern” 5-ci turda “Qröyter Fürt”ə səfərdə 3:0, 6-cı turda “Proysen”ə evdə 4:1 hesabıyla qalib gəldi. Sonuncu oyun sentyabrın 19-da keçirilib. Bu qələbə “qırmızı iblislər”i birgünlüyə zirvəyə daşıdı. Düzdü, sentyabrın 20-də “Braunşveyq”ə qalib gələn “Elversberq” zirvəni ələ keçirdi, “Kayzer” 2-ci pilləyə düşdü. Və Mahir son iki oyunda da yoxdu: nə ehtiyat oyunçular, nə də zədəlilər siyahısında! Emreli özü də artıq problemi etiraf edir: “Heç vaxt olmadığı qədər yaxşı formadayam. Özümü əla hiss edirəm, oynamağa hazıram. Ancaq kimi meydana buraxacağını baş məşqçi müəyyənləşdirir. Meydana çıxmamağımın başqa bir səbəbi yoxdu” (azerisport.com).

Bəli, Mahir legioner həyatında növbəti dəfə münasibət problemi ilə üzləşib. Baxın, mən hadisələrin belə axarına görə onu və ya baş məşqçi Torsten Liberknehti günahlandırmıram, sadəcə, ümumi mənzərəni göz önünə gətirdim ki, özünüz nəticə çıxara bilərsiz.

...Yaxınlarda vəfat edən Məmməd İsmayılın yaxşı şeirləri çoxdu. Məsələn, “Ağacdələn, döy qapımı, döy görüm”ü oxuyun, dəhşət ləzzət alacaqsız. Mən isə bu gün “Kimi aldadırsan, ay zalım oğlu”nu oxumaq istəyirəm...

HUŞƏNG