PSJ FFF ilə müharibəyə başladı - Dembele ilə Duenin zədələnməsi klubu özündən çıxarıb
Son ölkə çempionu və Çempionlar Liqasının qalibi PSJ Fransa Futbol Federasiyası (FFF) ilə açıq münaqişəyə başlayıb.
"Football-plus.az" xəbər verir ki, budəfəki münaqişənin səbəbi paytaxt klubunun hücumçularının – Usman Dembele ilə Dezire Duenin yığmanın heyətində Ukrayna ilə oyunda (2:0) aldığı zədə ilə bağlıdı. Klub rəsmiləri əmindi ki, bu zədələrdən qaçmaq olardı.
Futbolçuların zədələndiyi üzə çıxandan dərhal sonra PSJ futbol qurumuna rəsmi məkrub göndərib. Paytaxt klubu məktubda yığmanın tibb personalını Parisdən ayrı-ayrı futbolçularla bağlı göndərilən bilgini nəzərə almamaqda ittiham edib. Söhbət konkret Dembele ilə Duenin hansı həddə qədər yüklənməyə məruz qala biləcəyindən və zədə ehtimalından gedir. Paris klubunun rəhbərliyinin fikrincə, milli komandanın həkimləri, sadəcə, bu xəbərdarlığı nəzərə almayıb:
“PSJ arzulayır ki, bu xoşagəlməz hadisələr klubların tibbi heyəti ilə milli komanda arasında sistemli, sənədləşdirilmiş və qarşılıqlı fikir mübadiləsini təmin edən yeni rəsmiləşdirilmiş tibbi əlaqələndirmə strukturunun yaradılmasına, həmçinin futbolçuların - xüsusən də müalicə tələb edən zədəsi olduqda – çağrılması və belələrinin əməyindən istifadə zamanı gücləndirilmiş ehtiyat prinsipinə hörmət edilməsinə yol açsın”.
“L'Equipe” nəşrinin yaydığı xəbərə inansaq, PSJ-nin 4 sentyabr tarixli məktubunda əvvəllər yığmanın düşərgəsində zədə alan oyunçuların siyahısı da yer alıb. Parislilər bu zədələr arasında hansısa bağ görürlər, bu üzdən sistemli dəyişikliklər tələb edirlər. Onlar belə hesab edir ki, klub həkimləri ilə millik komandanın həkimləri arasında qarşılıqlı əlaqə protokolu olmalıdı.
Artıq ilk yarıda əzələsini zədələyən Due fasilədən sonra meydanda görünməyib. Gənc yarımmüdafiəçi 3-4 həftəliyə sıradan çıxıb. Maraqlıdı ki, onun əvəzinə meydana çıxan Dembele də sona qədər mübarizə apara bilməyib: 81-ci dəqiqədə sağ ombasından yapışan hücumçu Yuqo Ekitike ilə əvəzlənib. “Qızıl top”a iddialı hücumçuya ombanın arxa hissəsinin zədəsi diaqnozu qoyulub ki, onun da sıraya dönməsi üçün 6 həftə tələb olunur.
İş ondadı ki, Usman “Tuluza” ilə oyunda sol ombasında narahatlıq hiss etdiyinə görə PSJ-nin tibbi personalı yığmanın məşqçi korpusundan futbolçunu çox yükləməməyi xahiş edib. Ancaq yığmanın baş məşqçisi Didye Deşam iddia edir ki, futbolçunun sağlıq durumu qaydasında olub:
“Mən onu meydana buraxmışamsa, deməli, sağlamdı. Bu başqa ombadı, o, heç bir problem hiss etməyib”.
Təbii ki, iki aparıcı oyunçunun zədələnməsi PSJ üçün böyük zərbədi. Paytaxt klubu “Qarabağ”dan fərqli iki hücumçunun – Musa Qurbanlı ilə Nəriman Axundzadənin ümidinə qalmasa da, iki futbolçusunun yoxluğunda əziyyət çəkəcək. Dembele ilə Duenin Çempionlar Liqası çərçivəsində “Barselona” ilə oyunu buraxacağı dəqiqdi. Bundan başqa, Usman hətta noyabrda “Bavariya” ilə keçiriləcək oyunu da buraxa bilər. Təqvimdəki sıxlığı və rəqiblərin yüksək səviyyəsini nəzərə alsaq, bu itkilər həqiqətən də Luis Enrikeni qorxutmalıdı.Sonda hər iki futbolçunun cari mövsümdəki göstəricilərini də xatırladaq. Dembele bu mövsüm PSJ-nin heyətində bütün turnirlərdə keçirdiyi 8 oyunda 4 qol vurub, 3 məhsuldar ötürmə verib. 4 oyuna çıxan Duenun hesabında isə 1 məhsuldar ötürmə var.
Digər xəbərlər
