Azərbaycan Voleybol Federasiyasının (AVF) rəhbərliyi dünən qadın voleybolçulardan ibarət yığmanın üzvləri ilə görüşüb.

"Football-plus.az" xəbər verir ki, görüşdə AVF-in prezidenti Şahin Bağırov, vitse-prezident və yığmanın baş məşqçisi Faiq Qarayev, vitse-prezident Bəhruz Quliyev, baş katib Faiq Orucov və komandanın meneceri Səbinə Babayeva iştirak edib. Hazırda ölkə xaricində olan voleybolçular isə görüşə onlayn formatda qoşulub.

Tədbirdə çıxış edən Bağırov əvvəlcə bir müddət əvvəl başa çatmış Qızıl Avropa Liqası haqda danışıb. O, komandamızın bu il yarışda istənilən kimi çıxış edə bilməməsini təəssüflə qeyd edib. Bildirib ki, bir neçə aparıcı oyunçu müəyyən səbəblərdən yığmaya kömək edə bilmədi, bu da nəticənin zəif olmasına gətirib çıxardı. Bununla belə, AVF rəhbəri bu ilin noyabrında İslam Həmrəyliyi Oyunlarının, gələn ilin avqustunda isə Bakıda Avropa çempionatının qrup mərhələsinin təşkil olunacağını bildirib və bundan sonra məhz həmin yarışlara köklənməyin vacibliyini diqqətə çatdırıb. Bağırov onu da qeyd edib ki, ölkədə uşaq voleybolunun inkişafı ilə bağlı mühüm işlər görülür, istedadlı voleybolçular hazırlanır. O, bu voleybolçuların gələcəkdə yığmaya cəlb olunaraq mötəbər yarışlarda uğurla çıxış edəcəklərinə inamını ifadə edib. Federasiya prezidenti yığma üzvlərinə uğurlar və zədəsiz mövsüm keçirməyi arzulayıb.

Faiq Qarayev bildirib ki, artıq voleybolçular öz komandaları ilə növbəti mövsümə hazırlaşır. Buna baxmayaraq, İslam Həmrəyliyi Oyunlarına hazırlıq prosesinin də təşkil olunacağını vurğulayıb.

O, həmçinin gələn il ölkəmizdə keçiriləcək vropa çempionatının qrup mərhələsində iştirakla bağlı da müzakirələr aparılacağını əlavə edib. Qarayev yaxın aylarda qitə birinciliyinin qrup mərhələsinin püşkünün atılacağını və ondan sonra yarışa hazırlıq planının tərtib olunacağını deyib.

Yığma üzvləri də çıxış edərək qarşıdakı yarışlara hazırlıqla bağlı fikirlərini bölüşüblər.