Bildiyimə görə, “Ferentsvaroş”la oyun üçün satışa çıxarılan bütün biletlər sahibini tapıb və indi azərbaycanlı futbol azarkeşləri (həm də təkcə onlarmı?!) nəfəsini tutaraq səbirsizliklə komandaların meydana çıxmasını gözləyir.

İnanılmaz maraq var, söz yox, ətraf, küçə-bazar bilet axtaran adamlarla doludu, bəlkə bu gün “Bəhramov”un ətrafında “qara bazar” da tüğyan edəcək. Amma heç bir texniki detal günün gözəlliyinə, olayın əzəmətinə acı qata bilməz. Əslində belə maraq istisnasız ilk oyundakı nəticə ilə bağlıdı. Adamlar tarixi ana – “Qarabağ”ın Çempionlar Liqasında əsas mərhələyə vəsiqə qazanmasına şəxsən şahid olmaq, bu məqamı yaddaşına yazmaq istəyir. Nə qədər qəribə olsa da, onların əvvəllər belə şansı olmayıb.

Yüngülcə tarixə nəzər salaq. “Qarabağ” ilk dəfə qrupa düşdüyü 2017-ci ildə Bakıda “Kopenhagen”ə 1:0 hesabıyla qalib gələndən sonra səfərə çıxmışdı. Qrupa düşə də bilərdi, düşməyə. Amma onminlərlə azərbaycanlının uğulu bitən həmin dueldə, yəni Danimarkada komandanın yanında olmaq imkanı yox idi. Ardından “Qarabağ”ın əlinə iki dəfə də belə şans düşdü. 2022-də “Qarabağ” evdə “Viktoriya Plzen”lə heç-heçə edəndən sonra Çexiyaya yollandı, orda uğur qazansaydı belə, azərbaycanlılar yenə uzaqda idi. Zaqreb “Dinamo”su ilə ötənilki oyunlar da yadınızdadı. Səfərdən 0:3 ilə dönən “Qarabağ”ın evdə bu məğlubiyyətin əvəzini çıxa biləcəyinə inanmağa dəyməzdi. Kəsəsi, azarkeşlər müstəqil Azərbaycanın tarixində ilk dəfə belə tarixi uğuru görəcək. Kim stadionda olmağı bacaracaqsa, halal xoşu! Şəxsən mən “Qarabağ” rəhbərliyinin yerində olsaydım, Bakıda daha bir neçə yerdə monitor quraşdırar, paytaxtın sabah bu oyunun ab-havasından çıxa bilməməsi üçün şərait yaradardım. Amma mən klub rəhbəri deyiləm, jurnalistəm və indi ürəyimdən keçənlərə sizlə bölüşürəm.

Etiraf etmək lazımdı ki, rəqib də yetərincə güclüdü, Macarıstanın fəxridi, hun qardaşlarımızdan törəyənlərin qürur yeri, göz bəbəyidi. “Ferentsvaroş” imici qorumaq, ÇL-in qapısını möhkəm çırpmaq üçün Bakıda əlindən gələnə və gəlməyən hər şeyi edəcək. “Qarabağ”, xüsusən də Qurban Qurbanov və futbolçuları buna hazır olmalı, anın fərqinə varmalıdılar. Əslində “Sumqayıt”la çempionat oyununda “Qarabağ” camiəsinin məhz macarlarla duelin təsir dairəsində olduğu açıq-aydın görünürdü. Necə deyərlər, cismən “Azərsun Arena”da, ruhən “Bəhramov”daydılar.

Həm klub, həm də ölkə adına böyük məsuliyyətdi. Sanki ortada “olum və ya ölüm” variantı var, sanki “Qarabağ” üçün həyat ya bitəcək, ya da bitəcək. Mən bu sətirləri yazanda həyəcandan əsirəm, tüklərim biz-biz olur. Bu gün milyonlarla azərbaycanlının futbol ümidlərinin daşıyıcısı olan “Qarabağ”ın oyunçularının halını-əhvalını təsəvvür etmək belə istəmirəm. Adam özünü nə qədər ətrafda yaşananlardan kənar tutmaq, heç nəyə qulaq vermək istəməsə də, alınası iş deyil. Axı bütün ölkə, kiçikdən-böyüyə hər kəs futboldan danışır, sənə belə bağlayır, səndən qəhrəmanlıq gözləyir.

Futbol elə qəribə oyundu ki, hər anın öz hökmü var, bir anda hər şey dəyişir, bəzən çox böyük üstünlüyü də əldən verirsən. Bəzən oyunun gərginliyi hansısa futbolçunun psixikasını korlayır, adətən, sakit görünən birisi aqressivləşir, gözü heç nəyi görmür, dağıdıb-tökür. Futbol dilində bunun adı yanmaqdı. Təəssüf ki, “Qarabağ”ın tarixində belə epizodlar da olub. ÇL-in 2019/20 mövsümdə APOEL ilə oyunlar yadınızdadımı? Səfərdə aşkar üstün oynayan “Qarabağ” 90+5-ci dəqiqədə rəqibin fərqi azaltmasına imkan verdi. Evdə isə Kipr yunanlarına 0:2 uduzmaqla ÇL-in pley-offuna adlaya bilmədi. Bax, tarixdəki belə nəticələrdən nümunə götürmək lazımdı.

Əlbəttə, “Qarabağ”ın bu böyük üstünlüyü əldən verəcəyinə qətiyyən inanmıram. Komanda indi evdə 2:1 də yox, 3:1 hesablı qələbə ilə dönüb. Sakitcə bu işi bitirmək, ÇL-ə - “qurdlar süfrəsi”nə təşrif buyurmaq lazımdı. Ötən il AL-in əsas mərhələsində sonuncu yeri tutan ağdamlılar “Ferentsvaroş”la cavab görüşünə bir növ azarkeşlərə borcunu qaytarma vasitəsi kimi baxmalıdı. “Qarabağ” camiəsinə, özəlliklə də futbolçulara sonda daha bir mesaj vermək istəyirəm: bu elə oyundu ki, sadəcə, arxaya yol yoxdu. Arxada Vətən və onun futboludu.

Missiya bu gün bitməlidi və bitəcək! Bayram süfrəsini hazırlayın!

ORXAN