"Viktoriya" "Qarabağ"ın biletlərini satışa çıxarıb? - AÇIQLAMA
Çempionlar Liqasının pley-off mərhələsinin cavab matçında "Viktoriya" (Plzen) "Qarabağ"la görüşəcək.
Çexiyalılar qarşılaşma üçün 2 dəfə bilet satışa çıxardılar. Əvvəlcə prosesin 2 saat ərzində tükəndiyi bildirilmişdi. Daha sonra isə "Viktoriya" qarşılaşma üçün yeni biletləri satışa çıxardı. Onlar da 1 saat ərzində öz sahibini tapdı. Görəsən, ikinci dəfə satışa çıxarılan biletlər "Qarabağ"a aid sektorun idi? Plzenlilər Ağdam təmsilçisi üçün verilən biletləri satıblar? Suallarımızı "Qarabağ"ın mətbuat katibi Gündüz Abbaszadəyə ünvanladıq:
"İki klub arasında əldə olunmuş razılığa əsasən biz arenanın tutumunun 5 faizi qədər onlara yer verməli idik. Rəqib Bakıdakı oyun zamanı bizə bildirdi ki, Bakıya gəlmirik. Belə olan təqdirdə, biz də həmin biletləri satışa çıxardıq. Amma "Qarabağ" "Viktoriya"ya belə bir müraciət etməyib. Bu səbəbdən də onlar bizim üçün nəzərdə tutulan biletləri satışa çıxara bilməzlər. Bizə göndərilən məktubda bildirilir ki, "Qarabağ" azarkeşləri üçün 627 bilet ayrılıb. Oyun günü də U12 və U13 sektorlarında satış olacaq. Son olaraq qeyd edim ki, bizim razılığımız olmadan "Viktoriya"nın "Qarabağ" azarkeşləri üçün nəzərdə tutulan biletləri satmaq ixtiyarları yoxdu".
İLKİN SULTANLI
Digər xəbərlər
