Ötən gün Qazaxıstan təmsilçisi “Kayrat” tarixində ilk dəfə Çempionlar Liqasının əsas mərhələsinə yüksəldi.

Almatı təmsilçisi oyundan sonra “Qarabağ”a “ötürmə verib”. Qazax qardaşlarımız klubun “TikTok” və “instaqram” hesabında “Qarabağ”, indi sən” paylaşımını edib. Azərbaycanlı və qazaxıstanlı azarkeşlər tərəfindən duyğusal qarşılanan paylaşımda hər kəs “Kayrat”ı təbrik edib, “Qarabağ”a uğurlar arzulayıb. “Qarabağ” bu gün 8 illik xəyalı vüsala çevirsə, ən böyük məhsuldar ötürmə “Kayrat”dan gələcək.

Xatırladaq ki, 13 milyon avro “transfermarkt” dəyərinə malik olan “Kayrat” pley-offda Şotlandiyanın ən köklü klubu “Seltik”ı sıradan çıxardı. Hər iki oyunun əsas vaxtı 0:0 bitdi. Penalti seriyasında gənc qapıçı Timerlan Anarbekovun inamlı çıxışı qazaxları ən nüfuzlu qitə turnirinin əsas mərhələsinə daşıdı.

MÜZƏFFƏR QULUZADƏ