Asiyanın ən nüfuzlu klub turnirinin – Asiya Çempionlar Liqasının elit turnirinin püşkatma mərasimi keçirilib.

"Football-plus.az" xəbər verir ki, İran çempionu və Superkubokun qalibi olan “Traktor” da turnirdə çıxış edəcək.

Bu mövsüm turnirə ümumilikdə 24 komanda qatılacaq və onlar coğrafi prinsiplə “Qərb” və “Şərq” zonalarına bölünüb. Hər zonada 12 komanda mübarizə aparacaq və komandalar qruplar üzrə yox, vahid turnir sistemi ilə yarışacaq. Hər komanda səkkiz oyun keçirəcək. "Qərb" və "Şərq"in hərəsindən səkkiz ən yaxşı komanda 1/8 finalda oynamaq hüququ qazanacaq. Orda da komandalar öz zonalarında yer alanlarla qarşılaşacaq. Yalnız 1/4 final mərhələsindən "Qərb"lə "Şərq" birləşəcək. 1/4 final, yarımfinal və final görüşləri gələn il aprelin 17-25-də Səudiyyə Ərəbistanında keçiriləcək.

Püşkatmanın nəticələrinə əsasən, “Traktor” "Qərb" zonasında evdə "Əl-Sədd" (Qətər), "Əl-Şorta" (İraq), "Əl-Duhail" (Qətər) və "Əl-Vahda" (BƏƏ), səfərdə "Şabab Əl-Əhli" (BƏƏ), "Nasaf" (Özbəkistan), "Şarja" (BƏƏ) və "Əl-Qarafa" (Qətər) ilə qarşılaşacaq. Turnir sentyabrın 15-də başlayacaq.

Tarixində ilk dəfə İran çempionu olan "Traktor” ölkənin Asiya Çempionlar Liqası elit turnirində yeganə təmsilçisidi. Təbrizlilər ötən mövsüm Asiya Çempionlar Liqası 2 turnirinə qatılıb və 1/4 finaladək irəliləyib.