Abbaszadə: “Oyun vaxtı elə epizodlarla qarşılaşırıq ki, şərh verməkdə çətinlik çəkirik”
AFFA-nın binasında Misli premyer-liqasında çıxış edən klubların rəsmiləriylə 2025/26 mövsümündə tətbiq ediləcək yeni oyun qaydaları ilə bağlı görüş keçirilib.
Görüşdə AFFA Hakimlər Komitəsinin sədri Frank De Blekere və AFFA Hakimlər Departamentinin rəhbəri Ömər Paşayev iştirak edib. Onlar komandanın üzvlərinə qaydalarda və təlimatlarda edilən dəyişikliklər haqda məlumat verib. Federasiyada Misli premyer-liqasının yayın hüququna malik olan “CBC Sport”un şərhçiləri ilə də eyni xarakterli görüş olub. Bu dəfə iştirakçılar arasında yuxarıda adları çəkilənlərlə yanaşı, hakim Əliyar Ağayev də olub. De Blekere şərhçilərin suallarını da cavablayıb.
Görüşdə iştirak edən şərhçilərdən Gündüz Abbaszadə təəssüratını “Futbol+” ilə bölüşdü:
“Biz bunu ötən mövsüm də etmişdik. Fürsətdən istifadə edib belə şərait yaratdığı üçün AFFA-ya, vaxt ayırıb gəldiyi üçün De Blekereyə, həmçinin Əliyar Ağayevlə Ömər Paşayevə təşəkkürümü bildirirəm. Aydın məsələdi ki, hər mövsüm qaydalarda yeniliklər, təkmilləşdirmələr olur. Məqsəd o idi ki, Misli premyer-liqasının startı ərəfəsində şərhçilər bu yeniliklərlə tanış olsunlar. Seminar tipli görüş oldu. De Blekere ətraflı məlumat verdi. Oyun vaxtı elə epizodlarla qarşılaşırıq ki, şərh verməkdə çətinlik çəkirik. Yaxşı olardı ki, belə görüşlər müntəzəm, tez-tez olsun. Burda vaxt amili də nəzərə alınmalıdı. Məqsəd şərhçilərimizin məlumatlı, informasiyalı olması idi. Şərh zamanı yaşanan epizodlarda doğru şərh vermək vacibdi ”.
MÜZƏFFƏR QULUZADƏ
Digər xəbərlər
