Nəhayət, dünən yerli futbolsevərlərin premyer-liqa həsrəti sona çatdı. Yeni - 2025/26 mövsümünün 1-ci turunun ilk matçı keçirildi. Şamaxı şəhər stadionunda ötən mövsüm 1-ci liqada “at oynadanlar” üz-üzə gəldi.

İlk turun həyəcanı davam edir. “Qarabağ”ın Çempionlar Liqasının pley-offuna vəsiqə qazanması “Sabah”la matçın təxirə salınmasıyla nəticələndi. Qalan matçlar isə bu gün, sabah və avqustun 19-da keçiriləcək. Qarşılaşmalar “CBC Sport”un efirində canlı yayınlanacaq.

Misli premyer-liqası
1-ci dövrə, 1-ci tur
16 avqust
İmişli – Turan Tovuz 0:1
Roberto Olabe, 90+9.
Cəzalı: yoxdu.
“İmişli” bu rəqiblə ilk dəfə qarşılaşacaq.
“Futbol+”in proqnozu: 30-30-40.
Hakimlər: KAMAL UMUDLU, Namiq Hüseynov, Vüsal Məmmədov, Cavid Cəlilov.
VAR hakimi: Tural Qurbanov.
VAR hakiminin köməkçisi: Eyyub İbrahimov.
Hakim-inspektor: Ramil Diniyev.
AFFA nümayəndəsi: Eldəniz Musayev.
Şamaxı, şəhər stadionu. Saat 17.00.

“İmişli”nin mövsümlərarası fasilənin ən qalmaqallı klubu olduğunu desək, yanılmarıq. Aran təmsilçisinin birmənalı qarşılanmayan qərarlarının təməli baş məşqçi postuna portuqaliyalı Xorxe Kaskilyanın gəlişiylə qoyuldusa, yoxlama oyunu üçün seçilən sınaqçı-rəqiblər, ev oyunları üçün stadion axtarışlarının uzun müddət fayda verməməsi, Quba Olimpiya Kompleksi ilə anlaşandan sonra yaranan xaotik durum və məlum nəticə ciddi əks-səda doğurdu. Hadisələrin axarı “İmişli”nin hələ mövsüm başlamadan elitanı tərk etməyə əsas namizəd kimi göstərilməsiylə nəticələndi.

Qısası, klub səviyyəsində peşəkar davranmayan “İmişli”, heç olmasa, meydanda özünü yaxşı tərəfdən göstərməli və proqnozları yanıltmaq üçün əlindən gələni əsirgəməməlidi. “Turan Tovuz” isə çempionluq uğrunda mübarizə aparacaq. Bəli, hədəf azı bu mövsüm üçün çox çətin, demək olar ki, mümkünsüzdü. Görünür, Qərb təmsilçisi “boyundan yuxarı tullanmağa” cəhd edəcək. Necə deyərlər, bacarana can qurban!

Neftçi – Şamaxı 1:1
Emin Mahmudov, 45+2-p. - Karim Rossi, 23
“Neftçi”nin bu rəqiblə ev oyunlarının balansı: 39:+24=11-4, 74:34.
1999/00 – 5:1; 2000/01 – 7:2; 2001/02 – 0:0; 2003/04 – 2:1; 2004/05 – 1:1; 2005/06 – 1:1; 2006/07 – 0:1; 2007/08 – 2:0; 2008/09 – 1:3; 2009/10 – 2:1, 1:0; 2010/11 – 1:1, 0:0; 2011/12 – 0:1, 2:1; 2012/13 – 2:0, 2:0; 2013/14 – 3:1, 2:2; 2014/15 – 0:0, 0:2; 2015/16 - 1:1, 4:2; 2016/17 – 2:1, 2:1; 2017/18 – 3:1, 3:2; 2018/19 – 2:0, 2:0; 2019/20 – 0:0, 3:1; 2020/21 – 2:1, 3:1; 2021/22 – 3:0, 3:1; 2022/23 – 3:0, 3:1; 2024/25 – 2:2, 1:0.
Cəzalı: Edvin Kuç (Neftçi).
“Futbol+”in proqnozu: 40-30-30.
Hakimlər: ELÇİN MƏSİYEV, Elşad Abdullayev, Pərvin Talıbov, Kamranbəy Rəhimov.
VAR hakimi: İnqilab Məmmədov.
VAR hakiminin köməkçisi: Şirməmməd Məmmədov.
Hakim-inspektor: Babək Quliyev.
AFFA nümayəndəsi: Rüfət Əmirov.
Bakı, “Neftçi Arena”. Saat 20.00.

Yeni mövsümlərin dəyişməyən trendi “Neftçi”dən gözləntilərin yüksək olmasıdı. Futbol ictimaiyyəti bu dəfə də ənənəyə sadiqdi, lakin fərq var: indi baş məşqçi komandanı 2021-ci ildə çempion edən Samir Abasovdu. O, heyətdə ciddi islahatlar aparıb. Belə demək mümkünsə, arzuladığı kollektivi formalaşdıra bilib. İndi meydana çıxıb lazım olan qələbələri sıralamaq lazımdı. Düzdü, “ağ-qaralar” çempionluq uğrunda mübarizə aparacağını açıqlamayıb. Ancaq azarkeşlərin arzusu bəllidi. Hər halda, paytaxt təmsilçisi tərəfdarlarının xəyallarını gerçəkləşdirmək uğrunda mübarizə aparacaq. Bu yolda ilk maneə “Şamaxı”dı. Ayxan Abbasovun rəhbərlik etdiyi komandanın döyüşkən çıxışlarla yadda qalacağına şübhə yoxdu. “Şirlər” “Neftçi”nin qarşısına məhz qələbə qazanmaq üçün çıxacaq. Odu ki, sabah baxımlı oyuna şahidlik edəcəyimizə inanmağa dəyər.

Komandalar indiyə qədər 78 dəfə qarşılaşıb. Bunların 44-də Bakı, 16-da Şamaxı təmsilçisi qələbə qazanıb, 18-də qalib müəyyənləşməyib. Topların nisbətində “ağ-qaralar” öndədi – 124:71.

17 avqust
Sumqayıt – Kəpəz 3:0
Rüstəm Əhmədzadə, 14. Aleksandr Ramalinqom, 26. Aleksa Yankoviç, 38
“Sumqayıt”ın bu rəqiblə ev oyunlarının balansı: 16:+10=3-3, 29:16.
2011/12 – 4:1, 2:0; 2012/13 – 2:1, 1:0; 2015/16 – 2:2, 2:3; 2016/17 – 1:1, 3:1; 2017/18 – 2:1, 2:1; 2022/23 – 0:0, 1:2; 2023/24 – 1:0, 1:3; 2024/25 – 2:0; 3:0.
Cəzalı: yoxdu.
Hakimlər: FƏRİD HACIYEV, Rəhman İmami, Gülnurə Əkbərzadə, Vüqar Həsənli.
VAR hakimi: Rauf Cabbarov.
VAR hakiminin köməkçisi: Rahil Ramazanov.
Hakim-inspektor: Anar Salmanov.
AFFA nümayəndəsi: Elçin Mehtiyev.
Sumqayıt, Mehdi Hüseynzadə adına şəhər stadionu. Saat 20.30.

Ötən mövsümə uğursuz başlayan, heç cür toparlana bilməyən “Sumqayıt” yola yeni baş məşqçi Saşa İliçlə çıxacaq. Serbiyalı mütəxəssisin qarşısına qoyulan hədəf avrokuboklara vəsiqə qazanmaqdı. “Kimyaçılar” da rəqiblərindən geri qalmayıb, yay “transfer pəncərəsi” çərçivəsində heyətlə bağlı islahatlarını həyata keçirib. “Gənclik şəhəri”nin təmsilçisi azarkeşlərinin də yardımlıyla məqsədə çatmaq uğrunda mübarizə aparacaq və bunun imkansız olduğunu demək üçün hansısa əsasımız yoxdu. Təəssüf ki, “Kəpəz” haqda hələ müsbət nəsə demək olmur. “Sarı-göylər” klub daxilində yaşanan qalmaqallarla gündəmdədi, ictimaiyyətdə müsbət imic formalaşdıra bilməyib. Kollektivdə xeyli ayrılığın yaşanması, transferlərin yubanması, daimi təyinatlar gəncəliləri daha bir çətin mövsümün gözlədiyini xəbər verir.

Bu komandalar indiyə qədər 32 dəfə qarşılaşıb. Bunların 13-də “Sumqayıt”, 8-də “Kəpəz” qalib gəlib, 11-də “sülh” qeydə alınıb. Topların nisbətində “kimyaçılar” öndədi – 40:30.

KƏNAN BAHADIR

Bu komandaların duelləriylə bağlı maraqlı məqamlar
// “Neftçi” son iki görüşdə “quru” hesabla qalib gəlib. “Şamaxı” son 10 matçda qələbə qazanmayıb.
// “Sumqayıt” – “Kəpəz” duellərində son 4 matçda qonaq olan komanda qol vurmayıb. “Sumqayıt” ardıcıl iki “quru” ev qələbəsi qazanıb.