Məlum olduğu kimi, “Sabah” bu gün Konfrans Liqasının 3-cü təsnifat mərhələsinin cavab oyununda “Levski”ni sınağa çəkəcək. “Bayquşlar” rəqibi mübarizədən kənarlaşdırsa, tarixində ilk dəfə pley-offa vəsiqə qazanacaq.

“Bayquşlar”ın heyətində hansısa zədəli və cəzalının olmadığını yazmışdıq. Ancaq Bolqarıstan təmsilçisiylə bağlı durum fərqlidi. Bu barədə “sportal.bg” saytı məlumat yayıb.

Həmkarlarımızın xəbərinə görə, “Levski”nin heyətindən Mustafa Sanqare və Georgi Kostadinov zədəlidi. Onlar əzələ ağrılarından əziyyət çəkir. Bununla yanaşı, Karl Fabien də son məşqlərdən sonra ağrı hiss etməyə başlayıb və onun da cavab matçında iştirakı sual altına düşüb. Maraq üçün qeyd edək ki, Sanqare ilk matçda start heyətində yer alıb və 80-ci dəqiqəyə qədər oynayıb. Onun həmin görüşdə meydana zədəli halda çıxdığı bildirilir. Fabien isə 46-cı dəqiqədə şans qazanıb. Kostadinova gəlincə, o, ilk matçın iştirak ərizəsində yer almayıb.

Xatırladaq ki, bu gün “Bank Respublika Arena”da keçiriləcək “Sabah” – “Levski” oyunu saat 20.00-da başlayacaq.

KƏNAN BAHADIR