Almaniyanın 2-ci bundesliqa klubu "Kayzerslautern" növbəti yoxlama oyununda qüvvəsini sınayıb. Mahir Emrelinin də şərəfini qoruduğu komanda "Roma" ilə üz-üzə gəlib.

"Football-plus.az" xəbər verir ki, bu barədə "qırmızı iblislər"in mətbuat xidməti məlumat yayıb. "Fritz-Walter-Stadion"da, 35650 tamaşaçı önündə keçirilən, "Kayzerslautern"in 125 illiyinə həsr olunan matç rəqibin 1:0 hesablı qələbəsiylə nəticələnib. Həmyerlimizin komandası oyun ərzində bir neçə təhlükəli hücumla yadda qalsa da, hesabı bərabərləşdirə bilməyib. Mahir həmin epizodların baş rollarında çıxış etməyib. Start heyətində meydana çıxan hücumçu fasilədə əvəzlənən 7 futbolçudan biri olub.

Maraq üçün qeyd edək ki, "Kayzerslautern"in "Roma" ilə matç haqda detalları paylaşdığı xəbərin əsas şəklində komandadan yalnız Mahir yer alıb. Bildirək ki, "qırmızı iblislər" 2-ci bundesliqada 2025/26 mövsümünün ilk matçını avqustun 3-də keçirəcək. Onlar "Hannover-96"nın qonağı olacaq.

KƏNAN BAHADIR