Statistika mənbələrinə inansaq, Konfrans Liqasının 2-ci təsnifat mərhələsinin “Zirə” – “Hayduk” matçını tribunadan 5232 azarkeş izləyib.

“Neftçi Arena”nın 10289 yerlik olduğunu nəzərə alsaq, ortabab nəticədi. Amma bu məqamda məsuliyyəti rəqəmlərə yükləyib yaxamızı kənara çəksək, yumşaq desək, ayıb olar. Ona görə ki, stadionda anşlaq olmalıydı! Niyə?

Birincisi, “Zirə” Misli premyer-liqasında 2024/25 mövsümünü ikinci pillədə başa vurub. Özü də ardıcıl ikinci dəfə... Bu o deməkdi ki, “qartallar” ölkəmizin “Qarabağ”dan sonra ən güclü komandasıdı. Demək, məntiqlə elə “Zirə”dən əsas mərhələyə vəsiqə qazanmasını tələb etməyə ixtiyarımız var və bunun üçün stadionlara yollanmağa borcluyuq.

İkincisi, “Zirə” evdə meydana çıxsa da, favorit “Hayduk” idi. Sizi bunun səbəbindən xəbərdar etmişik. Hər halda, Xorvatiya təmsilçisi ölkənin ən titullu iki komandasından biridi (digəri Zaqreb “Dinamo”su). Düzdü, “dəniz ustaları” bu matçda özünə bənzəmədi. Lakin start fiti çalınana qədər heç kmi belə olacağını proqnozlaşdırmırdı. Qısası, “Zirə” daha çox tərəfdarın dəstəyinə möhtac durumda idi. Bunu Rəşad Sadıqov da etiraf etmişdi. Həm oyunöncəsi mətbuat konfransında digər klubların da azarkeşlərini stadiona çağırmaqla, həm də start heyətində 10 legionerə güvənməklə.

Üçüncüsü, rəqibin Azərbaycana 400-500 azarkeşlə, xüsusilə, “Torsida” fanklubuyla birgə gələcəyi hələ bir neçə gün əvvəldən bəlliydi. Onlar matçın başlamasına bir saat qalmış tribunadakı yerini almışdı. Onda hələ stadionda barmaqla sayılacaq qədər azərbaycanlı azarkeş var idi. İş ondadı ki, xorvatiyalı azarkeşlər minlərlə azərbaycanlını susdurdu, azarkeşlik mədəniyyətinin nədən ibarət olduğunu, ənənələrə sadiq qalmağın vacibliyini, komandanı səfərdə necə dəstəkləmək lazım olduğunu nümayiş etdirdi.

Bəs, onlardan, loru dildə desək, nəsə görüb-götürdükmü? Bundan sonra fərqli olacağıq, yoxsa “Hayduk” güclü rəqibdi”, “Torsida” Avropanın ən qədim fanklubudu” kimi bəhanələrə sığınmağa davam edəcəyik?

Cavabı bilirəm... Necə deyərlər, pir mənimdi, kəramətinə bələdəm...

KƏNAN BAHADIR