Klublararası dünya çempionatında (KDÇ) mübarizəni 1/8 finalda dayandıran “İnter Mayami” istiqaməti ABŞ çempionatına yönəldib.

"Football-plus.az" xəbər verir ki, Xavyer Masçeranonun komandası MLS-də rəqib tanımır. Lionel Messi isə qarşısına çıxanın qapısına iki qol vurur!

Öz rekordunu yenilədi
Argentinalı hücumçu 38 yaşında da hamını təəccübləndirməyə davam edir. “İnter Mayami” MLS-də növbəti oyununu keçirib. Masçeranonun komandası 23-cü turun oyununda evdə “Neşvill”lə qarşılaşıb və 2:1 hesablı qələbə qazanıb. Messi dubl etməklə komandasının qələbəsində böyük rol oynayıb. Argentinalı hücumçu ardıcıl 5-ci matçda 2 qol vurmaqla unikal göstəriciyə imza atıb. Ona görə ki, bu, MLS-də yeni rekorddu!

Lionel tarix yazmağa davam edir. Dünya çempionu ABŞ çempionatında ardıcıl 5 oyunda rəqib qapısına iki dəfə yol tapan ilk futbolçudu. O, bununla öz rekordunu yeniləyib. Çünki Leo bundan əvvəl “Nyu İnqlənd” (2:1), “Kolambus Kryu” (5:1) və iki dəfə “Monreal İmpekt”ə (4:1, 4:2) iki qol vurmuşdu.
Messi son oyunun ilk hissəsində cərimə zərbəsi ilə hesabı açıb: topu qapının aşağı küncünə yönəldib. İkinci hissədə isə rəqibin səhvindən yararlanıb: qapıçının uğursuz ötürməsindən sonra topu ələ keçirən argentinalı rəqibini aldadaraq boş qapını nişan alıb. Bir sözlə, komandasına çətin qələbə qazandırıb.

Masçeranonun onun qəhrəmanlığına reaksiyası özünü çox da gözlətməyib. Baş məşqçi həmyerlisinin indiki yaşında da “meydan sulaması”na belə şərh verib:

“İnter Mayami” Messinin sayəsində MLS-dəki məğlubiyyətsiz seriyasını 6 oyuna çatdırıb. Komanda hazırda Şərq konfransında 19 oyuna 38 xalla 5-ci yerdədi. Mayamililərin KDÇ-dəki çıxışına görə 3 oyun az keçirdiklərini də bildirək.

Qol seriyası davam edir
Lionel iyulun 13-də nail olduğu rekordla kifayətlənmir. Messi ümumilikdə MLS-də ardıcıl 6 oyundu rəqib qapısına yol tapır. O, bu oyunlarda 11 qolun müəllifi olub. Qeyd edək ki, yüksək liqada indiyədək analoji göstəricilərə yalnız bir futbolçu nail olub: 2018-ci ilin iyul-avqust aralığında venesuelalı Xosef Martines “Atlanta Yunayted”in formasında ardıcıl 6 oyuna 11 qol vurub.

Lionelin hazırkı məhsuldar seriyası sayəsində MLS-in cari mövsümündə 16 qolla bombardir olması qəribə görünmür. Sem Serricin də hesabında bu qədər qol var. Fərq ondadı ki, “Neşvill”in ingiltərəli hücumçusu çempionatda 22 oyun keçirib və qollarından beşini penalti ilə reallaşdırıb. Messi isə meydana çıxdığı 16 oyunda bir dəfə olsun penaltidən istifadə etməyib.

“Barselona” ilə rəsmən vidalaşacaq
Yeri gəlmişkən, dünya şöhrətli futbolçu “Barselona” ilə rəsmən vidalaşacaq. Bu xəbəri “Catalunia Radio” yayıb. Radiostansiyanın məlumatına görə, ulduz futbolçu sabiq klubunun formasında “Kamp Nou” stadionunda yenidənqurma işləri sona çatandan sonra görünəcək. “Barselona” rəhbərliyi artıq Messinin bununla bağlı razılığını alıb.

Xatırladaq ki, Lionel məhz İspaniya klubunun yetirməsidi. O, göy-qırmızı formada 2004-21-ci illərdə çıxış edib. 10 dəfə İspaniya çempionatının, 7 dəfə İspaniya kubokunun, 7 dəfə İspaniya Superkubokunun, 4 dəfə Çempionlar Liqasının, 3 dəfə Avropa Superkubokunun, 3 dəfə KDÇ-nin qalibi olub. Qeyd edək ki, Lionel 2021-ci ildə “Barselona”nı klubun maliyyə problemləri səbəbindən tərk etmişdi. Həmin ilin yayında PSJ-yə keçən hücumçunun sabiq klubu ilə vida matçı keçirmək imkanı olmamışdı.