“Premyer-liqadan 1-ci liqaya düşməzdən əvvəl PFL-ə 110 min manat borcumuz qalıb. AFFA bizə 700 min manat dəstək göstərdi. Biz də PFL-dən ötən il nə qədər xahiş etdik ki, bizə pul vermirsiz, heç olmasa, siz də bu 110 mini silin. Amma silmədilər”.

"Ertələməyə də razı deyildilər, birtəhər razı saldıq. Bəlkə də dostlar məndən inciyəcək, amma açıqlamalıyam. 110 min manatın 50 min manatı 13-cü legioner sifarişinə görə idi. 2023/24 mövsümünün son oyunlarında gənc oyunçularımız debüt etməyə başladılar. Əvəzedici heyətdə olan gənclərin adını da sifariş vərəqəsinə yazdırdıq ki, o ab-havanı hiss etsinlər. Onsuz da premyer-liqadan düşürük, ən azı onlara təcrübə olsun. Bu zaman gənclərdən biri – Elnur İbrahimov Rusiya vətəndaşı olsa da, fərqində olmamışıq. Komandanın meneceri də Elnur adını görüb və siyahıda başqaları kimi onun da yerli olduğunu düşünərək “okey” verib. Həmin futbolçu bir oyun ehtiyatda oldu. Hazırda həmin futbolçu heç bizim komandada da deyil, deyəsən, futbolu buraxıb. Belə səhv nəticəsində böyük məbləğdə ziyana düşdük”.

“12 legionerimiz olduğundan, bunu da 13-cü kimi nəzərə alan PFL bizi 50 min manat cərimələdi. Düzdü, bizim səhvimizdi, amma bu formada baş verib. Dedik siz də bilirsiz ki, təsadüfi olub. Müraciət etdik ki, 110 mini keçmirsiz, ən azı 50 mini silin. Lap siz də, biz də açıqlama verək ki, belə bir səhv olub. Kimsə etiraz edərsə də, belə başa salmaq olar. İlin-günün bu vaxtı heç nədən 50 min zərərə düşdük. Ötən il iki avtobusumuzu satıb akademiyaya xərcləmişik. Bu yandan isə nəyə görəsə 50 min manat cərimə ödəməliyik. Haqlı qərardı, amma nəyəsə görə keçmək olardı”.

“Üzvlük haqqı ilə bağlı əvvəllər çox boşluqlar var idi. 2022-ci ildə Elxan Səmədov prezident seçiləndən sonra klublara bildirildi ki, əvvəlki borclarınız silinir. Amma xahiş edirik, bundan sonra diqqətli olun. Bu, təkcə “Qəbələ”yə aid məsələ deyildi. Əksər klubların borcu var idi. Hər dəfə güzəşt edilərsə, AFFA İcraiyyə Komitəsinin rüsumlarla bağlı qəbul etdiyi qərarın heç bir mənası qalmır. Ümumilikdə ən çox borcu silinən klub “Qəbələ”di. Təəssüf ki, bu barədə danışmayıblar və bu da yumşaq desək, səmimiyyəti şübhə altına alır. İndiki borc məbləğini isə silinmədən sonra yığıblar. Bununla yanaşı, “Qəbələ” klubuna dəfələrlə güzəşt məktubu və borcunu ödəməsi üçün möhlət verilib. Elnur İbrahimov adlı futbolçuya gəlincə, Rusiya vətəndaşı olan futbolçu - başqa sözlə, legioner niyə ehtiyatda oturulur ki? Klubda legionerlə yerlinin fərqləndirilə bilməməsi də artıq başqa reallıqdı”.