Gələn mövsüm ikinci liqada 12 klubun mübarizə aparacağı gözlənilir.

Təbii ki, onların maliyyə durumunda ciddi fərqlər var. 1-ci liqaya vəsiqə qazanmağa iddialı, normal büdcəyə malik klublarla yanaşı, hətta mövcudluq təhlükəsi yaşayanlar da çoxdu. Bəzi “kasıb” klublarla əlaqə saxladıq.

Məlum oldu ki, “Dinamo” sponsor olmadan həm aşağı yaş quplarını, həm də əsas komandanı ayaqda saxlamağa çalışır. Nə qədər çətin olsa da, Yaşar Seyidovun rəhbərlik etdiyi klub bunu bacaracağına inanır, gələn mövsüm də 2-ci liqada çıxış edəcəklər.

“Sheki City”də həm oxşar, həm də fərqli vəziyyət var. Şəki təmsilçisi ətrafında “biznes-klub” layihəsi işə düşüb, kluba dəstək verən iş adamlarının sayı 10-a çatıb. Həmçinin İdarə Heyəti yaradılıb, millət vəkili Vüqar İskəndərov bu quruma seçilib. Bir sözlə, “halvaçılar” da 2-ci liqada mübarizə aparacaq. Maliyyə durumu bir az da düzəlsə, iddialı klublardan biri olmaq niyyətindədilər.

“Göygöl” də sponsorsuzluqdan əziyyət çəkir, “narçılar” rayonun İcra Hakimiyyətinin dəstəyi ilə 2-ci liqada mübarizə aparacaq.

1-ci liqada sonuncu yeri tutmaqla 2-ci liqaya düşən “Qaradağ Lökbatan” da çətin vəziyyətdədi, taleyi sual altındadı. Aparıcı futbolçuların hamısı gedib. Klubun direktoru Bəbir Məmmədovla əlaqə saxlayanda 2-ci liqada oynamaq fikirlərinin olduğunu dedi, maliyyə məsələlərinin avqustun ilk həftələrində təsdiqlənəcəyini bildirdi. Çox güman ki, bu klub dağılmayaq.

“Qusar”da da rəhbərlik səviyyəsində dəyişikliklər olub. Gələn həftə klub yeni icraçı direktorunu və büdcəsini təsdiqələyəcək. Bu isə şimal təmsilçisinin 100 faiz mübarizə aparacağı deməkdi.

MÜZƏFFƏR QULUZADƏ