“Ümumiyyətlə, son səfər çərçivəsində "Şirvan", "Göygöl", "Şəmkir", "Göyəzən" və "Sheki City" ilə görüşlərimiz olub. Sadaladığım hər klubda vəziyyət fərqlidi, ancaq müzakirələrimiz əsasən maliyyə dayaqlarının formalaşması və FİF tərəfindən dəstək imkanları ilə bağlı idi. Sponsorun olması yaxşıdı, amma daimi dayanıqlılıq anlamına gəlmir. Ona görə də klubun sponsorsuz olması bizim üçün əsas amil deyil. Hətta bizim vasitəmizlə kluba baş sponsor cəlb ediləndən sonra da klubla əməkdaşlığımız tamamlanmır. "Göyəzən"lə uzun müddət idi maraqlanırdıq. Bölgənin futbola marağı, klubun elitadan gedəndən sonra da fəaliyyətini dayandırmaması, ən əsası klubun idarəçiliyində həvəsli və fədakar adamların olması bizim üçün vacib amillərdəndi. Baş sponsorun dəstəyini dayandırması xəbəri isə əlavə siqnal oldu. Görüşümüzün məhsuldar keçdiyinə inanıram. Baxmayaraq ki, Region Liqası klubları ilə əməkdaşlıq etmirik, "Göyəzən"ə dəstək göstərməyə çalışacağıq. Şəkidə isə artıq dayanıqlı maliyyə dayaqları yolunda müəyyən addımlar atılıb. Səfərimiz “Sheki City” ətrafında “biznes-klub” layihəsinə qatılanlarla növbəti görüş ilə bağlı idi. Əvvəlki görüşdən sonra “biznes-klub” layihəsinə qatılanların sayı artaraq, 10-a çatıb. Bununla da “biznes-klub”dan gəlirlər 3000 manata yüksəlib. Növbəti mövsüm üçün digər gəlirləri hesablamasaq, klubun gəlirlərində dövlət proqramının payı 62,5 faiz təşkil edəcək. Görüşdə “biznes-klub” layihəsinə qoşulanlardan ibarət İdarə Heyəti yaradılmasına qərar verildi. Səsvermə yolu ilə ilk il üçün sədr seçildi. İştirakçılar millət vəkili Vüqar İskəndərova etimad göstərdi. Ümumiyyətlə, “biznes-klub” layihəsinin klublar üçün yeni maliyyə kanalı kimi uğurlu format olduğunu düşünürəm. Yaxın zamanlarda bunu bir neçə bölgə klubunda da tətbiq etməyi planlaşdırırıq”.