“Burda o qədər də böyük məbləğ yoxdu” – “halvaçılar”dan cavab
2-ci liqa təmsilçisi “Sheki City”nin yeni sponsorla anlaşdığını xəbər vermişdik.
“United Payment Azerbaijan” şirkəti kluba maliyyə dəstəyi göstərməyə başlayıb. Razılıq Futbolun İnkişaf Fondunun (FİF) “Biznes-klub” layihəsi çərçivəsində əldə olunub. Daha bir neçə tərəfdaş da layihədə iştirak edəcəyini, bölgə klublarına bu yöndə dəstək göstərəcəyini təsdiqləyib. Yaxın zamanda bununla bağlı tədbir təşkil olunacaq və yekun nəticələr ictimaiyyətə açıqlanacaq.
Maliyyənin həcmi sizə fayda verəcək qədərdi? Bunun sayəsində mövsümün 2-ci yarısında yüksək pillələr uğrunda mübarizə aparmağınız mümkündümü? Bu sualları klub prezidenti Elgün Hüseynova ünvanladıq:
“Yeni sponsor deyil. Kampaniya FİF tərəfindən başladılıb. Ötən mövsüm “Zaqatala”da da var idi. Burda o qədər də böyük məbləğ yoxdu. Hər tərəfdaş komandaya dəstək olacaq. Bir neçə tərəfdaşla danışıq gedir. Tərəfdaşların sayı çox olarsa, bizim üçün böyük dəstəkdi. Biz bu məbləği öncə infrastruktura xərcləmək istəyirik. 2-ci liqada qalmaq üçün bir neçə oyunçu transfer etmişik”.
ƏSƏD SEYİDOV
Digər xəbərlər
