''Fənərbaxça''nın Marko Asensio ilə bağlı planları həyata keçmədi.

Xəbər verdiyimiz kimi İstanbul nəhəngi tanınmış ispaniyalı futbolçu ilə danışıqlar aparırdı.

Bəzi mənbələr tərəflər arasında ilkin anlaşma əldə olunduğunu da yazırdı. Joze Mourinyo da Asensio ilə söhbətləşmiş, eləcə də ona görüntülü şəkildə İstanbulda yaşayacağı ev də göstərilmişdi. Əsas problem maaş məsələsi idi. ''Fənərbaxça'' ''Real''ın sabiq üzvünə illik 9 milyon avro təklif etmiş və onu danışıqların son detallarını razılaşdırmaq üçün İstanbula dəvət etmişdi. Amma tanınmış futbolçu bir müddət düşündükdən sonra təklifi geri çevirib.

Asensio bunu maaş məsələsi ilə yox, karyerasını ''böyük beşlik'' ölkələrindən birində davam etdirmək istəyi ilə əsaslandırıb. Ona ''Milan'', ''İnter'' və ''Vilyarreal'' maraq göstərir.

Qeyd edək ki, müqavilə ilə PSJ-yə məxsus olan 29 yaşlı futbolçu ötən mövsümün ikinci dövrəsini icarə əsasında ''Aston Villa''da keçirmiş və bu klubda 21 rəsmi oyunda aktivinə 8 qol, 1 məhsuldar ötürmə yazmışdı.