Ardıcıl ikinci yay Niko Uilyamsın adı ətrafındakı transfer dastanı ilə müşayiət olunur.

"Football-plus.az" xəbər verir ki, süjet, demək olar ki, aşağı-yuxarı eynidi: “Barselona” pul yığmağa və “Atletik”in gənc ulduzu ilə anlaşmağa çalışır. Bir il əvvəl, vingerin möhtəşəm keçirdiyi Avropa çempionatından sonra da sövdələşməni bitirmək mümkün olmamışdı.

Düşünmək olardı ki, builki cəhd uğurlu alınacaq. Hər şey “Barsa”nın ispaniyalının müqaviləsində kompensasiya məbləği kimi göstərilən 58 milyon avronu ödəməsinə və keçidin reallaşmasına doğru aparırdı. Çoxsaylı insaydlarda deyilirdi ki, kataloniyalılar futbolçunun razılığını alıb, o özü də keçidin bitməsi üçün məzuniyyəti erkən başa vuracaq. Hətta müqavilənin imzalanacağı tarix də göstərilirdi – iyulun 4-ü.

Nə demək olar, yalan demirmişlər. İyulun 4-ü gəlib çatdı, həqiqətən də müqavilə imzalandı. Ancaq müqavilənin altında “Barsa”dan heç kimin imzası yox idi. Ona görə ki, Uilyams doğma Bilbao klubu ilə yenidən, özü də 10 il (!) müddətinə anlaşdı. “Atletik” dəbbəpulunu da ikiqat artırdı. İndi Nikonu ələ keçirmək istəyən klub 100 milyon ödəməlidi.

Fikir verin, gənc ulduzun müqavilə müddəti 2035-ci ilə qədər uzadılıb! Bəzi qaynaqlar hətta bunun futbol tarixində ən uzunmüddətli müqavilə olduğunu iddia edir. Əlbəttə, rəmzi xarakter daşıyan ömürlük müqavilələri nəzərə almasaq. Niko olayı belə şərh edib:

Nikonun bilərəkdən müqaviləyə belə bənd saldırdığını və ya “Barselona”nın həqiqətən qeydiyyatla bağlı təminat vermədiyini demək çətindi – nə qədər istəsən, nəzəri müddəa tapmaq olar. Bəlkə də onun qərarına fanatların inanılmaz nifrət elementləri təsir edib. Onlar futbolçunun şəhərin divarlarında yer alan şəkillərini çirkləndiriblər, əcaib hala salıblar.

Yəqin ki, gerçək motivlər bir o qədər vacib deyil. Fakt odu ki, vinger yenə də Bilbaonu tərk etmədi. Amma bu da futbolçunun strateji səhvə yol verdiyini deməyə əsas verir. Axı Nikonun potensialı basklar ölkəsinin komandasının səviyyəsindən açıq-aşkar yüksəkdi. “Atletik” hər mövsüm maksimum Çempionlar Liqasına vəsiqəyə ümid edir. Hətta bu da nadir hallarda olur – məsələn, 21-ci əsrdə bir dəfə bunu bacarıblar. İndiki “Barsa” Nikonun həm oyun üslubuna, həm də ambisiyalarına ideal şəkildə uyğundu.

Düzdü, Uilyams dünya ulduzu səviyyəsinə yüksəlməyə qadirdi, ancaq doğma komandada buna nail olmaq hədsiz çətindi. Bundan sonra isə Bilbaonu tərk etmək daha çətin olacaq. Biz müqavilənin müddətini və yeni şərtləri nəzərdə tuturuq. Əvəzində böyük qardaş, yəni İnyaki Uilyams razıdı. Hər halda, bu da vacib amildi.

Yaxşı, Niko ilə bağlı hər şey aydındı, ancaq “Barselona”nın hücumameyilli futbolçu transfer etməsi ilə bağlı məsələ hələ də aktuallığını qoruyur. A planı pozulubsa, alternativ siyahıda kimlər var? Avropa mediasına inansaq, əsasən iki futbolçunun namizədliyi gözdən keçirilir. Birincisi “Liverpul”dan Luis Diasdı. Məşhur insayder Fabritsio Romanonun yazdığına görə, məhz kolumbiyalı Uilyamsla bağlı uğursuzluqdan sonra kataloniyalıların əsas hədəfinə çevrilib.

Bu məsələ də o qədər asan deyil. Mersisaydlılar son günlərə qədər həvəslə təmas qururdusa, Dioqo Jotanın faciəvi ölümü vəziyyəti dəyişdi. Portuqaliyalının ölümünə sırf idman baxımından yanaşsaq, hazırda Diası buraxmaq çox təhlükəlidi. Ona görə ki, “qırmızılar” irəli xətdə rotasiya etmək imkanından məhrum ola bilər. Belədə “Barsa” ya kisənin ağzını daha geniş açmalıdı, ya da “Liverpul” ön xəttə hansısa yeni transfer reallaşdırmalıdı.

Daha bir variant Markus Reşfordun adı ilə bağlıdı. Əslində qışda da onun personası “Barsa” ilə yanaşı hallanırdı. Sadəcə, onda ingiltərəli ulduzu “Aston Villa” icarəyə götürdü. Birmingemlilər onun transfer hüququna yiyələnmək istəmir, “Mançester Yunayted”də qalacağı da o qədər inandırıcı görünmür. Belə görünür ki, Markus Amorimə lazım deyil. Elə o özü də “Old Trafford”da çoxlu qalmaqal törədib.

Əlbəttə, Reşfordu heyətə qatmaq olar və bu lazımdı. “Transfermarkt”da 50 milyon avroya qiymətləndirilən ingiltərəli ulduz premyer-liqanın son mövsümündə yetərincə səviyyəli oyun göstərdi, meydanda fərq yaratmağı bacardı.

Çox güman, “Barsa” tezliklə Niko Uilyamsı unutduracaq kimisə “rənglərinə bağlayacaq”. Bu komanda meydanda nə dərəcədə yaxşı oyun göstərirsə, klub idarəçiliyi baxımından bir o dərəcədə xaotik və qarışıq durum hökm sürür. Necə olur-olsun, Hans-Diter Flik heyəti gücləndirməlidi. Ötən mövsümdəki səviyyəni qorumaq və boyundan bir qədər də yuxarı tullanmaq üçün. Niko üçün isə bizə elə gəlir ki, hələ də Kataloniya klubunun qapısı bağlanmayıb. Ya da ən azı həmin qapıya açar qoyulmayıb.