Fransanın yeddiqat çempionu “Lion” 2-ci liqaya göndərildi.

"Football-plus.az" xəbər verir ki, bunun səbəbi “şilər”in maliyyə tələblərinə uyğun gələ bilməməsidi. Bu qərar Fransanın ən məşhur klublarından birinin gələcəyinə ciddi təsir göstərə bilər. Rəsmi açıqlama İdarəçiliyə nəzarət üzrə Milli Direktorluğun (DNCG) saytında yer alıb.

Bu qurum Fransada peşəkar futbol klublarının hesablarının monitorinqinə və yoxlanılmasına görə məsuliyyət daşıyır. Saytda məhz belə göstərilib:

Detallar tam bəlli olmasa da, media klubun maliyyə meyarlarına uyğun gəlmədiyini xəbər verir. “Lion”un apellyasiya şikayəti yazmaq hüququ var, ancaq proses uzun çəkə bilər – bu isə komandanın yeni mövsümə hazırlığını çətinləşdirəcək və heyəti qorumağı sual altına alacaq.

Fransa mediasının yazdığına görə, aşağı dəstəyə düşməsinə baxmayaraq, “Lion” Avropa Liqasında çıxış etmək hüququnu saxlayır. 2024/25 mövsümündə 57 xal toplamaqla Liqa 1-də 6-cı yeri tutan klub UEFA-nın 2-ci dərəcəli turnirində mübarizə aparacaq.

Klubun problemlərini sahibi – “Eagle Football Holdings” multiklub strukturunu (bura “Lion”la yanaşı, “Botafoqo” və “Molenbek” də daxildi) idarə edən amerikalı biznesmen Con Tekstorun fəaliyyəti ilə bağlayırlar. “Lion”u 2022-ci ildə 940 milyon dollara alan Tekstor “City Football Group” və ya “Red Bull” nümunəsi üzr yeni sistem qurmağa qərar verdi. Ancaq onun strategiyası maliyyə balanssızlığına səbə oldu: “Lion”un vəsaiti “Botafoqo”ya insvestisiya kimi qoyuldu ki, Braziliya klubunun maliyyə və turnir vəziyyəti düzəlsin.

“Botafoqo” ciddi transferlər gerçəkləşdirdi – hazırda “Zenit”də çıxış edən Luis Enrikeni, “Lion”a icarəyə verilən Tyaqo Almadanı aldı. Bütün bu addımlar Fransa klububda büdcə kəsirinə və 2024-ün payızında transferə məhdudiyyət qoyulmasına gətirdi. Maliyyə meyarlarına uyğunlaşmaq üçün klub 175 milyon avroluq kəsiri qapamalıydı. Ötən müddətdə 83 milyon investisiya cəlb etmək mümkün oldu, qış transfer kampaniyası “şirlər”ə daha 28,5 milyon qazandırdı. Rayan Şerkinin “Mançester Siti”yə satılması büdcəyə daha 42,5 milyon, icarəyə verilən oyunçuların satışı da 22,5 milyon gətirdi.

Həmçinin Kakre, Antoni Lopeş, Lakazett və Talyafiko ilə vidalaşan klub maaş cədvəlində təxminən 30 milyon avroya qənaət etdi. Bundan başqa, “Lion” 100-ə yaxın əməkdaşını ixtisara saldı.

Bununla belə, bu addımlar da kömək etmədi. Liqa 1-də qalmağın yeganə yolu uğurlu apellyasiya şikayətidi. Klubun bunun üçün 7 gün vaxtı var. “Lion”un şikayət ərizəsi uğur gətirməsə, onda elitada buranı idman prinsipi üzrə tərk edən “Reyms” qalacaq.

Həmçinin “Lion” daha bir liderini, məsələn, “Çelsi”nin iddia etdiyi Fofananı sata bilər. Potensial transfer 40 milyon avroya qiymətləndirilir və həlledici amil rolunu oynaya bilər. Klubun taleyi indi meydandan kənarda veriləcək qərarlardan asılıdı. “Lion” Fransanın ən titullu və tanınan klublarından biridi, çoxları “şirlər”in aşağı düşməkdən qurtulacağına, maliyyə möhkəmliyini qaytaracağına ümid edir.

Onu da əlavə edək ki, bir il əvvəl ölkənin daha bir tanınan klubu – “Bordo” da oxşar vəziyyətlə üzləşib. Maliyyə böhranından qurtula bilməyən “Bordo” 4-cü liqaya göndərilib.

ORXAN

P.S. Belə vəziyyətdə PSJ “Lion”un köməyinə çatıb. Paytaxt klubu Bredli Barkolaya görə pulun ödənişini nəzərdə tutulan vaxtdan tez başa çatdırıb. Fransalı vinger PSJ-yə 2023-ün yayında 45+5 milyon avroya keçmişdi. Bu pulu alan “Lion” DNCG qarşısında maliyyə göstəricilərini yaxşılaşdırıb.
P.P.S. Dünən Mişel Kanqın Tekstoru prezident vəzifəsində əvəz etdiyi ilə bağlı xəbər yayıldı. 66 yaşlı xanım 2023-dən bəri klubun Direktorlar Şurasının üzvü idi.