“Lion” ciddi problemlə üzləşib. Fransa klubu “maliyyə feyr-pleyi” ilə bağlı problemin həlli üçün oyunçularını satışa çıxarıb.

“Ekip” qəzetinin yaydığı xəbərə görə, rəhbərlik yay “transfer pəncərəsi” bağlanana qədər 100 milyon avro təmin etməlidi. Əks halda klub Milli Maliyyə Monitorinqinin müəyyənləşdirdiyi normalara cavab verməyəcək və ciddi cəzaya məruz qalacaq. Məlumatda lionluların Liqa 1-dən kənarlaşdırıla biləcəyi də vurğulanır. Klub belə aqibətlə üzləşməmək üçün əsas heyətin, demək olar ki, bütün üzvlərini satışa çıxarmağa məcbur olub. Futbolçuların agentlərinə müştərilərinin tansferə çıxarıldığı və onlara görə alınacaq təkliflərin qısa zamanda dəyərləndiriləcəyi ilə bağlı bildiriş göndərilib.
Yeri gəlmişkən, “Lion” artıq bir oyunçusu ilə vidalaşıb. Mamadu Sarr “Strasbur”a keçib. Müdafiəçinin satışı kluba 10 milyon avro qazandırıb.

“Lion”un yetirməsi yeni klubu ilə müddəti 2029-cu il iyunun 30-na qədər nəzərdə tutulan müqavilə bağlayıb. 18 yaşlı Mamadunun lionluların əsas komandasında yalnız 3 oyunda meydana çıxdığını da bildirək.