“Borussiya” ilə “Ulsan”ın duelində yeganə maraq doğuran məqam dortmundluların neçə qol vuracağı idi. Çünki Koreya təmsilçisi səviyyə baxımından aşkar geridə idi. Həm də pley-off şansı qalmayan komandanın bu oyunda heç bir iddiası yox idi.

“Arılar” isə əksinə, qrupu lider kimi bitirmək üçün qalib gəlməliydilər. Matçın qəhrəmanı koreyalıların qapıçısı Ço Hyon Vu oldu. Zarafat deyil, o, oyunu 10 (!) seyvlə tamamladı. Çonu yalnız “Borussiya”nın cinah müdafiəçisi Svensson məyus edə bildi. Cob Bellingem bu dəfə fərqlənə bilməsə də, hesabına məhsuldar ötürmə yazdı. Dortmundluların əsas qol silahı Girassi bu görüşdə inanılmaz fürsətləri boşa verdi. İstənilən halda Niko Kovaçın komandası qarşıya qoyulan hədəfə çataraq qrupu lider kimi tamamladı və pley-offda “Monterrey”in rəqibi oldu.

Maraqlıdı ki, “Ulsan” tarixi ərzində FİFA-nın turnirlərində keçirdiyi 7 qarşılaşmanın hamısından məğlubiyyətlə ayrılıb! 2-ci turda “Borussiya”ya 3 qol vuran “Mamelodi Sandaunz”un “Fluminense” ilə oyundakı performansı maraq doğururdu. Hər halda, afrikalıların taleyi öz əllərində idi.

Maraqlıdı ki, braziliyalıların baş məşqçisi Renato Qauşo təcrübəli Tyaqo Silvanı ehtiyatda saxlamışdı. Amma bu məqam “Mamelodi”yə yardım etmədi. Komanda heç cür “Fluminense”nin sıx müdafiəsini yara bilmədi. Hiss olunurdu ki, Libertadores kubokunun ötənilki qalibi meydana konkret qol buraxmamaq hədəfi ilə çıxıb. Çünki səviyyəcə rəqibdən üstün olan bir klubun oyunboyu topa yalnız 32 faiz nəzarət etməsinə başqa izah tapmaq çətindi. Amma necə deyərlər, qaliblər mühakimə olunmur!

“Fluminense” adını ən güclü 16 komanda sırasına yazdıraraq “İnter”ə rəqib oldu.

F qrupu, 3-cü tur
Borussiya D – Ulsan 1:0 (1:0)
Borussiya (Dortmund, Almaniya): Kobel, Ryuyerson, Kouto, Anton, Bensebayni, Svensson, Nmeça (Brandt, 58), Qross (Reyna, 78), Adeyemi (Dyuranvill, 59), Cob Bellingem (Bayer, 58), Girassi (Çukvuemeka, 78).
Ulsan (Koreya): Ço Hyon Vu, Kan San Vu, Troyak (Yul Heo, 86), Kim Yon Qvon, Li Ce İk, Lüdviqson, Li Cin Hyun, Boyaniç (Hyu Cun Li, 80), Lakava (Park Min Seo, 46), Kim Min Hyok (Ko Sun Bom, 46), Farias (Li Çun Yon, 80).
Qol: Svensson, 36.
Vərəqələr: Kim Min Hyok, 17. C.Bellingem, 28. Nmeça, 53. Kan San Vu, 54 – sarı.
25 iyun. Sinsinnati. 8239 tamaşaçı. 

Mamelodi Sandaunz – Fluminense 0:0
Mamelodi Sandaunz (Pritoriya, Cənubi Afrika): Uillyams, Mudau, Kupido (Lebusa, 60), Kekana, Lunqa, M.Alyende, Mokoena (Adams, 46), Ribeyro (Şalulile, 76), Zvane (Letlaku, 85), Mettyus (Seyls, 60), Rayners.
Fluminense (Rio de Janeyro, Braziliya): Fabio, Şavyer, İqnasio, Freytes, Rene, Erkules (Bernal, 67), Nonato (Santos, 86), Martinelli (Lima, 76), Arias, Kanobbio (Keno, 67), Kano (Everaldo, 86).
Vərəqələr: Mokoena, 10. Arias, 88. Bernal, 89. Fabio, 89. Rene, 90+5. Letlaku, 90+6 – sarı.
25 iyun. Mayami. 14312 tamaşaçı.

1. Borussiya D 3 2 1 0 5-3 7
2. Fluminense 3 1 2 0 4-2 5
3. Mamelodi Sandaunz 3 1 1 1 4-4 4
4. Ulsan 3 0 0 3 2-6 0