Tennisdə mövsümün 3-cü böyük dəbilqə seriyalı turniri olan ''Uimbldon'' davam edir.

"Football-plus.az" xəbər verir ki, Londonda keçirilən və tennis dünyasının ən nüfuzlu turnirlərindən sayılan ''Uimbldon''da bu il türkiyəli Zeynəp Sönməz yaxşı mənada təəccübləndirməkdə davam edir.

Qadınlarda reytinqin 88-ci pilləsində qərarlaşan Sönməz 1-ci mərhələdə reytinqdə 55-ci pillədə qərarlaşan rumıniyalı Jakelin Kristianı məğlub etməklə tarix yazmışdı. O, ''Uimbldon''da ikinci mərhələyə yüksələn ilk türkiyəli qadın tennisçi olmuşdu.

Sönməz bu uğurla kifayətlənməyib. Bu gün keçirilən ikinci mərhələ çərçivəsindəki oyunda o, reytinqin 32-ci pilləsində qərarlaşan çinli Ksinyu Van ilə qarşılaşıb. Zeynəp güclü rəqibini hər iki setdə 7:5 yenərək sürpriz şəkildə adını 3-cü mərhələyə yazdırıb. O, son 75 ildə böyük dəbilqə seriyalı turnirdə 3-cü mərhələyə yüksələn ilk türkiyəli tennisçi kimi adını tarixə yazdırıb!

Sonuncu dəfə türkiyəlilərdən bu uğuru 1950-ci ildə ''Rolan Qarros''da Bahtiye Musluoğlu yaşamışdı.

Zeynəp 3-cü mərhələdə Yekaterina Aleksandrova - Syuzan Lamens cütünün qalibi ilə qarşılaşacaq.