Məlum olduğu kimi, “Sabah” Avropa Liqasının 1-ci təsnifat mərhələsində “Selye” ilə qarşılaşacaq.

“Football-plus.az” Sloveniya təmsilçisinin rəsmi saytına istinadla xəbər verir ki, komanda artıq yay təlim-məşq toplanışına başlayıb.

“Qraflar” prosesə 25 futbolçuyla start verib. Onlardan 19-u əsas heyətin, 6-sı isə “Selye” akademiyasının üzvüdü. Çünki baş məşqçi Albert Riera rəsmi matçlarda klubun yetirmələrinə də şans vermək istəyir. Komandada çıxış edən milli üzvləri hələ istirahətdədi.

Kollektiv hazırda Sloveniyanın şimal-qərbində, Yuxarı Karniola bölgəsində Sava Dolinka çayı üzərində, Avstriya və İtaliya sərhədlərinin yaxınlığında yerləşən Kranjska Qora şəhərində hazırlıq keçir.

Prosesin birinci hissəsi iyunun 26-da başa çatacaq. İki gün dincələcək “qraflar” iyunun 29-dan iyulun 7-yə kimi hazırlığın ikinci – sonuncu hissəsini başa vuracaq. Komanda keçirəcəyi yeganə yoxlama oyunu çərçivəsində Serbiya superliqasında çıxış edən “Çukariçki” ilə qarşılaşacaq.

Xatırladaq ki, “Sabah”ın nə baş məşqçisi bəllidi, nə də yay hazırlıq planı...

KƏNAN BAHADIR