İtaliyanın Milan şəhərini təmsil edən “İntet”in baş məşqçisi Simone İnzaqi istefaya göndərildi. Klub onunla müqavilənin qarşılıqlı razılıq əsasında pozulduğunu açıqlayıb.

Doğrudu, Çempionlar Liqasının finalındakı məğlubiyyət xeyli acınacaqlı alındı. Amma unutmaq lazım deyil ki, Paris klubuna ərəblərin milyonları illərdi axıdılırdı. Bunun qarşılığında isə ciddi uğur yox idi. Belədə budəfəki finalda rəqibin “İnter” olması lap yerinə düşdü. Gücünü toparlayan PSJ böyükhesablı qələbə ilə dünyanın ən nüfuzlu klub turnirinin kubokunu başı üzərinə qaldırdı. “İnter” finala yüksəlməklə “boyundan yuxarı tullanmağı” bacarmışdı. İnzaqinin çalışdırdığı komanda finala qədər “Bavariya”nı və “Barselona”nı yolundan kənarlaşdırmışdı ki, hər iki qarşılaşmada rəqib favorit sayılırdı. Deməli, finala yüksəlməyin özü belə “İnter” üçün yaxşı nəticə sayılmalıydı.

Amma “İnter”in rəhbərliyi bunu belə saymadı. Ümumiyyətlə, bu mövsüm “İnter”ə sanki həlledici məqamda uğur qazanmaq üçün nəsə çatmadı. Elə İtaliya A seriyasında da son turlara qədər “İnter” çempionluğa ən böyük namizəd sayılırdıi. Amma gözlənilməz büdrəmələrin fonunda “Napoli”nin dirçəlməsi sonda iki komanda arasında amansız mübarizənin getməsini şərtləndirdi ki, Neapol təmsilçisi “İnter”i 1 xal üstələməklə çempion oldu. Hər iki cəbhədəki büdrəməni İnzaqiyə bağışlamadılar. Halbuki bizim tərəflərdə “bu il alınmadı, inşallah, gələn il istəyimizə çatarıq, mövsüm bizim üçün yaxşı keçib” deyərdilər.

Belə çıxır ki, “İnter”in qarşısında konkret iki hədəf dayanırmış - Çempionlar Liqasının və İtaliyanın A seriyasının qalibi olmaq. Məqsədə çatmadınsa, baş məşqçi yola salınmalı, yeni məcaralar axtarışı üçün yeni mütəxəssis dəvət olunmalıdı.

Sizin də yadınızda olar. Bir müddət əvvəl “Neftçi”nin baş məşqçisi Samir Abasova sual vermişdilər ki, hədəfə çatmasaz, yəni “Neftçi” avrokuboklara vəsiqə qazana bilməsə, istefa verəcəksizmi? Adam aşıb-coşmuşdu. Suala sualla cavab vermişdi ki, nə üçün istefa verməliyəm? Gözlənildiyi kimi, “Neftçi” avrokuboklardan kənarda qaldı. Ölkə kubokunun finalına yüksələ bilməyən “ağ-qaralar” premyer-liqada da çox aşağı səviyyədə çıxış etdi.

Hər halda, burda “biabırçı” təyinindən istifadə etsəm, kimsə məni qınamaz. “Neftçi” mövsümü 43 xalla, 6-cı pillədə başa vurub. 36 oyuna cəmi 10 qələbə, 13 məğlubiyyət ölkənin ən iddialı və ən zəngin iki-üç klubundan biri üçün qürur mənbəyi sayıla bilməz. Samir Abasov bütün bu uğursuzluqların səbəbkarı kimi özündən əvvəlki baş məşqçini nişan verir, heyəti özünün formalaşdırmadığını deyir. Bununla da bulanıq sudan quru çıxmağa çalışır. Amma olub-bitənləri diqqətlə təhlil edəndə görürük ki, belə yanaşma heç də ədalətli deyil.

Əvvəla ona görə ki, Samir Abasov oktyabrın birinci yarısında “Neftçi”yə baş məşqçi təyin olunub. Onun vəziyyəti düzəltmək üçün xeyli zamanı vardı. İkincisi, qış fasiləsində “Neftçi” heyətinə əl gəzdirib, məhz Abasovun istəyi ilə heyətdən göndərilənlər və transfer edilənlər olub. Bunun fonunda “Neftçi” nəinki “Qarabağ”a heç qol vurmağı bacarmayıb, “Araz Naxçıvan”a “diş batırmaq”, öz ad-sanına uyğun çıxış etmək də alınmayıb. Sonda da “ağ-qaralar” mövsümü ədalətli olaraq 6-cı pillədə bitiriblər. İndi Samir Abasov köhnələri yola salıb, yeniləri qarşılamaqla məşğuldu.

Məlum məsələdi ki, gələn mövsüm budəfəki bəhanələr keçərli olmayacaq. Uğursuzluqlar davam etsə, yola salınmaq növbəsi elə Abasovun özünə çatacaq. Artıq 9 futbolçunun komandadan yola salındığı açıqlanıb. Növbəti günlərdə bu siyahının genişlənəcəyi gözləniləndi. Amma yüksəködənişli, di gəl ki, faydalı iş əmsalı aşağı olan futbolçular hələ də “Neftçi”nin sıralarındadı. Məlum məsələdi ki, Ramil Şeydayevlə Emin Mahmudov “Neftçi”dən yetərincə ciddi məbləğdə məvacib alırlar. O pulları dünyanın heç bir yerində, Azərbaycanın heç bir klubunda onlara verməzlər.

Ramil, ümumiyyətlə, qol vurmağı yadırğayıb, meydanda boşuna vurnuxmaqla məşğuldu. Eminin liderlik keyfiyyəti hər nə qədər önə çəkilsə də, yaş öz sözünü deyir və həlledici məqamlarda uzunmüddətli zədələr onun yaxşı günlərinin geridə qaldığını göstərdi. “Neftçi” əvvəlcə belə bahalı futbolçulardan qurtulmalıdı ki, onlara verilən pulları kassasında saxlayıb, normal transfer edə bilsin.

Samir Abasov bu cür məsələlərdə qətiyyət göstərə bilmir. Çünki yararsız futbolçuları “Neftçi”yə dolduranlar bu gün də klubda söz sahibidi. Elə həmin adamlar Samir bəyi baş məşqçi postuna gətiriblər. Deməli, Abasov onlara qarşı çıxa bilməz. Belədə “Neftçi”nin də “ağ günlərə çıxacağı” şübhə doğurur.

AMAL