9 oyundu qələbəyə həsrət qalan yığmamız bu gün Macarıstanla qarşılaşacaq.

Latviyanı, Belarusu, Haitini məğlub edə bilməyən milli macarlara nə edəcək? - demək çətindi.

Macarıstan yığması illərdi Avropaya səs salan komandadı. Heyətində ulduz futbolçular da var.
Təkcə elə Dominik Soboslainin “transfermarkt” qiyməti (80 milyon avro) milli komandamıza cəlb olunan bütün futbolçuların dəyərindən təxminən beş dəfə çoxdu. Futbolçu çempion “Liverpul”un əvəzedilməzlərindəndi.

Biz 25 yaşlı sol cinah müdafiəçimiz Elvin Cəfərquliyevlə fəxr ediriksə, macarların Miloş Kerkezi var ki, “transfermarkt” qiyməti 45 milyondu. “Real”dan “Liverpul”a kimi bir çox top klub sol cinah müdafiəçisinə “elçi düşüb”.

Rolan Sallai “Qalatasaray”ın futbolçusudu. “Qalatasaray” Mahir Emrelinin arzuladığı beş klubdan biridi.

Bir sözlə, istər fərdi, istər komanda şəklində Macarıstan millisinə çatmağımıza çox var. Nə qədər ki, Avropa səhnəsində ölkəmizi layiqincə təmsil edən futbolçular olmayacaq, Macarıstana qalib gəlmək də yuxu olacaq…

MÜZƏFFƏR QULUZADƏ