Bilindiyi kimi, "Turan Tovuz"da mövsümlərarası fasilə dönəmində ilk ayrılıq yaşanıb.

"Bozqurd" müdafiəçisi Araş Qaderiylə yolları ayırıb. İranlı karyerasını vətənində - "Xeybər"də davam etdirəcək. Futbolçu artıq yeni klubuyla müqavilə bağlayıb.

Təbii ki, komandayla bağlı yeniliklər bununla yekunlaşmır. Növbəti mövsümdə də avrokuboklara vəsiqə uğrunda mübarizə aparmağa hazırlaşan bölgə təmsilçisi heyətin formalaşdırılması yönündə çalışmaları davam etdirir. Daha əvvəl yanvarda Mahaçqala "Dinamo"sundan mövsümün sonuna qədər icarəyə götürülən Anton Kraçkovski ilə müqavilənin yenilənməyəcəyini yazmışdıq.

Redaksiyamıza daxil olan məlumata görə, baş məşqçi Kurban Berdıyev daha bir futbolçu ilə bağlı qərarını qətiləşdirib.

"Football-plus.az" xəbər verir ki, "Turan Tovuz" iyunun sonunda müqaviləsinin müddəti başa çatacaq Aleks Serrano ilə daha bir mövsüm yola davam etmək istəyir. İş ondadı ki, futbolçuyla klub arasında maddi şərtlər üzündən anlaşmazlıq yaranıb. İspaniyalı "bozqurd"dan daha çox məvacib tələb edir. İnsafən, buna haqqı da var. O, başa çatan "futbol ili" ərzində meydana çıxdığı 35 premyer-liqa matçında 4 qol, 7 məhsuldar ötürmə ilə yadda qalıb. Serrano yarımmüdafiənin mərkəzində və hücumameyilli yarımmüdafiəçi kimi çıxış edə bilir.

Bununla belə, onun həm başqa ölkələrdən, həm də premyer-liqamızdan təklif aldığı məlumdu. Serranoyla ən yaxından maraqlanan klub isə ölkəmizi Konfrans Liqasında təmsil etməyə hazırlaşan "Zirə"di.

Qısası, qeyd olunan amillər Kurban Berdıyevin aparıcı futbolçunu heyətdə saxlamaq cəhdlərini çətinə salır. Hər halda, Serrano hələ yekun qərarını bildirmək üçün "Turan Tovuz"dan vaxt istəyib. Klub isə futbolçunun daha çox maaş tələbini dəyərləndirir.

Xatırladaq ki, Xixon "Sportinq"inin yetirməsi olan 30 yaşlı ispaniyalı karyerası ərzində "Espanyol", "Malyorka", "Talavera", "Selta", "Salamanka", "Kornelya" (hamısı İspaniya), "Qurnik" (Polşa) və "Hebar" (Bolqarıstan) klublarının formasını geyib.

KƏNAN BAHADIR