Joze Mourinyo ötən yay ''Fənərbaxça''nın başına böyük ümidlərlə gətirilsə də, camiənin çempionluq həsrətinə son qoya bilmədi. Ancaq ortaya çıxan rəqəmlər ünlü mütəxəssisin karyerası baxımından heç də bərbad deyil.

"Football-plus.az" xəbər verir ki, müstəqil məşqçi karyerası 2000-ci ildə ''Benfika''da başlayan Mourinyo daha sonra ''Leyriya'', ''Portu'', ''Çelsi'', ''İnter'', ''Real'', ''Mançester Yunayted'' və ''Tottenhem''i çalışdırıb.

Onun karyerasını iki hissəyə bölmək olar. İlk 13 ildə böyük uğurlar qazanaraq adını futbol tarixinə yazdıran ünlü mütəxəssis 2013-cü ildən sonra pillə-pillə geriləməyə başladı. Orta hesabla hər oyuna toplanılan xal baxımından o, ən yaxşı göstəricilərini ''Portu'' (2,32) və ''Real''da (2,30) yaxalayıb.

''Fənərbaxça'' onun başçılığı altında mövsüm ərzində keçirdiyi 56 rəsmi oyundan 35 qələbə, 12 heç-heçə, 9 məğlubiyyətlə ayrılıb ki, bu da hər oyuna 2,09 xal deməkdi. Mourinyo 2013-cü ildən bu yana ilk dəfə bir klubun başında orta hesabla hər oyuna ən azı 2 xal toplamağı bacarıb.

Başqa sözlə desək, o, son 12 ildə karyerasının ən yaxşı göstəricisinə məhz Türkiyədə nail olub! Ancaq buna baxmayaraq Mourinyonun bu göstəricisi İsmayıl Kartalın 2023/24-dəki göstəricisindən cox geridədi.

Müqayisə üçün bildirək ki, İstanbul nəhəngi Kartal ilə 2023/24-də 58 rəsmi oyunda 44 qələbə, 7 heç-heçə, 7 məğlubiyyətlə ayrılmışdı ki, bu da hər oyuna orta hesabla 2,40 xal deməkdi.