“Qarabağ”a bel bağlamamışdıq” - Şəhriyar Əliyev günahı özlərində gördü
Azərbaycanda futbol mövsümünə yekun vuruldu. Sumqayıtda keçirilən ölkə kubokunun final oyununun nəticəsini təkcə “Sabah”la “Qarabağ”ın yox, “Zirə” ilə “Turan Tovuz”un da azarkeşləri maraqla gözləyirdi.
Və sonuncular ağdamlıların qələbəsini arzulayırdı. Axı belədə “qartallar”ın Avropa, tovuzluların Konfrans Liqasına yolu açılacaqdı. Hətta Tovuzda azarkeşlərin finalı izləməsi, sonra da komandalarının avrokuboklara vəsiqəni bayram etməsi üçün xüsusi yerlər hazırlanmışdı. Sonda tovuzlu azarkeşlər məyus halda evlərinə dağılışdılar.
“Turan Tovuz” camiəsinin isə gileylənməyə haqqı yoxdu. Ona görə ki, zamanında qələbə, xal qazanıb, 3-cü pilləni ələ keçirmək lazım idi. Amma Kurban Berdıyev və futbolçuları “Qarabağ”ın kuboku qazanacağını, 4-cü yeri tutmaqla da Avropaya yollana biləcəklərini düşünürdülər. Sadəcə, bizdə yaxşı bir el məsəli var e, onu unutmuşdular: qonşuya ümid olan şamsız qalar!
Bəs “Turan Tovuz”un avrokuboklardan kənarda qalmasının məsuliyyəti kimin üzərinə düşür? “Qarabağ”a bel bağlamaq doğru strategiya idi Bu sualları klubun sabiq vitse-prezidentinə, kapitanına və azarkeş qrupunun rəhbərinə ünvanladıq.
Yaşar Sultanov (sabiq vitse-prezident):
“Yox, təbii ki, Qarabağın nəticəsinə bel bağlamaq heç vaxt komandanın strategiyası olmayıb və ola da bilməz. Bu, sadəcə, yekun turnir cədvəlinin doğurduğu bir təsadüf idi. Ümumiyyətlə, “Turan Tovuz”un turnir cədvəli üzrə yekun mövqeyi mənim üçün üzücü oldu. Axı komanda rahatlıqla daha yüksək yerlərdə qərarlaşa bilərdi. Çox acınacaqlı və təəssüf doğuran məğlubiyyətlər yaşadı komanda. Ən çox xalları autsayderlərlə oyunlarda itirdilər. Bundan əlavə, komandanın müdafiə xətti uzun müddətə sıradan çıxdı və oyun ritmi tam pozuldu. Klubda görülən məqsədyönlü işləri nəzərə alaraq, inanıram ki, növbəti il yenilənmiş, daha mübariz bir komanda görəcəyik”.
Şəhriyar Əliyev (kapitan): “Kollektiv olaraq, Konfrans Liqasında iştirak etmək istəyirdik. Sona qədər mübarizə apardıq. “Araz-Naxçıvan”ı geridə qoyub, şanslarımızı daha da yaxşılaşdırmaq istəyirdik. “Qarabağ”a bel bağlamamışdıq. “Qarabağ”ın kubokun qalibi olmasını istəyirdik, alınmadı. Üçüncü yeri özümüz qazanmaq istəyirdik. Avrokuboklara yollanmamağın günahını özümüzdə görürük. Səhvlərə yol verməməyə çalışacağıq. İtirdiyimiz xallar 3-cü pillədən bizi aralı saldı”.
Kamal Saqqayev (“Ultras Turan”ın rəhbəri): “Bax yaxşı sualdı, verim cavabını. Birbaşa qərəzdi. Hakimlərin vaxtında elədikləri haqsızlıqlar bir komandanın əziyyətini belə puç edir. Qərəzdi, hakimlər ucbatından kənarda qaldıq”.
ƏSƏD SEYİDOV
Digər xəbərlər
