"Kəpəz"lə bağlı uzun müddətdi cavabsız qalan xeyli suala mayın 10-da aydınlıq gəldi.

Xatırlayırsızsa, həmin gün Gəncə təmsilçisinin İdarə Heyətinə yeni sədr seçildi. Bu vəzifə Namiq Qədirova tapşırıldı. İdarə Heyətinə üzv seçilən Fərman Əlizadə sədrin idarəçilik, Erkin İbrahimov isə idman məsələləri üzrə müşaviri təyin olundu.

Məlum olduğu kimi, Namiq Qədirovun kluba həm də maliyyə ayıracağı haqda bilgilər var. Düzü, futbol ictimaiyyəti adı çəkilən şəxsin "sarı-göylər"in tarixi əzəmətini bərpa edəcəyini, hətta komandanın 2025/26 mövsümündən etibarən avrokuboklarda mübarizə apara bilməsi üçün ciddi maliyyə dəstəyi göstərəcəyini düşünürdü. Hər halda, həm gözləntilər bu yöndə idi, həm də mətbuatda bu barədə onlarla xəbər tirajlanmışdı. Ancaq Erkin bəyin ötən həftə qəzetimizə verdiyi açıqlama məhz bu mövzuya aydınlıq gətirdi. Bəlli oldu ki, klubun yeni söz sahiblərinin faəliyyətinin əsas məqsədi akademiya ilə bağlı olacaq. Yəni Namiq bəy və ətafında toplaşan şəxslər yeniyetmə futbolçuların inkişaf etdirilməsiylə məşğul olmağa üstünlük verəcək, nəinki Gəncə adını Avropaya daşımağa...

İş ondadı ki, klubla bağlı yanılmalar bununla bitmir. "Sarı-göylər" bu yaxınlarda, daha doğrusu, mayın 25-də baş məşqçi Azər Bağırovla yolları ayırmaqla xeyli azarkeşlərin pis sürpriz kimi qiymətləndirdiyi növbəti addımı reallaşdırdı. Bəli, hadisələlərin axarına "gedəni saxlamaq olmaz" prinsipiylə yanaşmaq olardı. Ancaq mütəxəssisin komandadan ayrılandan sonra televiziya efirlərinə çıxıb "baş məşqçinin işinə heç kim qarışmamalıdı, o özü heyəti formalaşdırmalıdı, futbolçuları seçməlidi" ifadələrini işlətməsi tərəflərin konkret hansı mövzuda anlaşa bilmədiyini ortaya qoyur.

Görünür, yeni rəhbərlik Azər Bağırovun yalnız komandanı baş məşqçi kimi meydana çıxarmaq funksiyasını saxlamaq, qalan işləri özləri görmək niyyətində imiş ki, mütəxəssis ildən-ilə gərginliyi artan, mübarizənin qızışdığı çempionatda belə risk etmək istəməyib.

Bu arada redaksiyamıza daxil olan məlumata görə, 2022-ci ilin sentyabrında klubun İdarə Heyətinin sədri seçilən İlqar Nadiri (o, bunadək icraçı direktor idi) yenidən icraçı direktor vəzifəsinə gətirilib. Buna qədər icraçı direktor vəzifəsində olan Cabir İbrahimov isə "Kəpəz" Məşq Mərkəzinin rəhbəri postunda əyləşəcək.

Hər halda, hazırda "Kəpəz"lə bağlı yeganə konkretləşməyən məqam baş məşqçinin kimliyidi. Bəllidi ki, heyətlə bağlı məsələlər də məhz bu mövzuya aydınlıq gələndən sonra müzakirəyə çıxarılacaq. Bizə isə hadisələrin axarını izləmək qalır.

Görək, yeni rəhbərliyin klub tarixində açdığı yeni səhifə səliqəli olacaq, yoxsa qaralamaya çevriləcək?

KƏNAN BAHADIR