Yayın istisində harda sərinlənmək olar?
Hamamda!
Qışın soyuğunda harda qızınmaq olar?
Hamamda! (“O olmasın, bu olsun” filmindən)

Fernando Santuşun çalışdırdığı Azərbaycan millisi iyunun 10-da Mərdəkanda Macarıstanla qarşılaşacaq.

Artıq görüşü idarə edəcək hakimlərin də adları açıqlanıb. Eloğlumuz, AFFA-nın ən sevimli hakimlərindən olan Cavid Cəlilovun dördüncü hakim kimi yer alıdğı briqadanın qalan üzvləri Belarusdan olacaq. Baş hakim Viktor Şimusikə həmyerliləri Sergey Kasavetslə Anton Qusev kömək edəcək. Ümid edirəm ki, belaruslu ədalət qoruyucuları qarşılaşmanı yaxşı idarə edəcəklər, 90 dəqiqənin sonunda hakim qərarları müzakirə mövzusuna çevrilməyəcək.

Bu məsələdə diqqətimi çəkən başqa məqam oldu. Bəli, AFFA-nın məhz belaruslu hakimlərə dəvət göndərməsi xeyli maraqlı məqamdı. Çünki son illərdə AFFA ilə Belarus Futbol Federasiyası arasında əlaqələr yüksələn xəttlə inkişaf etməkdədi. Belarusdan gələn hakimlərin millimizin Macarıstanla oyununda söz sahibi olması da bu möhkəmlənən əlaqələr zəncirinin növbəti halqasıdı. Cəmi iki ay əvvəl, martın son günlərində elə Fernando Santuşun çalışdırdığı milli komandamız Belarus millisini Masazırda qəbul etmişdi. Təəssüf ki, belaruslar Masazırda özlərini qonaq kimi aparmadılar, bizim komandamızdan qat-qat üstün oyun sərgiləyib, 2:0 hesablı qələbəylə evlərinə döndülər.

Əsas milli ilə yanaşı, aşağı yaş qrupları üzrə komandalarımız da son vaxtlar belaruslarla intensiv görüşlər keçirirlər. Ayxan Abbasovun bu yaxınlarda baş məşqçi təyin olunduğu U-21 yığmamız iyunun 2-də əks marşurut üzrə hərəkət edib, Minskə yollanacaq. Orda bizim gənclərimiz belaruslu həmyaşıdları ilə qarşılaşacaqlar. Bu yoxlama görüşü iyunun 4-də Baranoviçi şəhər stadionunda, yerli vaxtla saat 19.00-da başlayacaq. Mayın əvvəlində də belaruslarla qarşılaşmışıq. Amma həmin qarşılaşma U-21 yox, daha aşağı yaş qrupu üzrə komandalar arasında keçirilib. Belə ki, Aqil Nəbiyevin rəhbərlik etdiyi 16 yaşadək futbolçulardan ibarət yığma belaruslara qarşı iki yoxlama görüşündə qüvvəsini sınayıb.

Tarixin səhifələrini bir qədər də geri vərəqləməklə bu cür yoxlama oyunlarının sayını xeyli artırmaq da olar. Bakı ilə Minsk arasında son aylarda futbol əlaqələri genişlənib, yığmalarımız bir-birinin ardınca Belarusa səfər edir, orda yoxlama xaraketli oyunlar keçirir. Elə ordan da bura xeyli qonaq gəlir.

Futbolçuların sırasına hakimlərin də qoşulması, iyunun əvvəlində keçiriləcək yoxlama görüşünün Belarusdan gələcək hakimlər briqadasına həvalə olunması həmin o əlaqələrin bariz nümunəsidi. Adımız dünyanın futbol xəritəsində görkəmli yerdə olmasa da, belaruslu dostlarımız bizi tək qoymur.

AFFA-nın baş katibi Cahangir Fərəcullayev Meksikanın Azərbaycandakı fövqəladə və səlahiyyətli səfiri Mariya Viktoriya Romero Kabalyero ilə görüşüb. Çox keçməz ki, Meksika da bizə Belarus kimi qardaşlıq edər, onlarla əlaqərlərimiz intensivləşər, yoxlama görüşləri keçirməyə başlayarıq.

Hələlik isə “Yaşasın, çox yaşasın Belarus!” deyək!

AMAL