“Təəssüf ki, qələbə qazana bilmədik. Çempionluğu final kimi oyunda əldə edə bilərdik. Uşaqlar oyuna çox yaxşı hazırlaşmışdı. Oyunda da bunu göstərdilər. İlk 20 dəqiqədə iki top vurmuşduq. Möhtəşəm, fantastik oyun oynadıq. “Sabah”ın uğurunə kölgə salmaq istəmirəm. Çempionluğa biz daha layiq idik. Mövsüm ərzində biz onlara məğlub olmadıq. Şəxsi görüşləri götürsəydilər, çempionluq bizim idi. Bütün bizi istəyənlər – “Forza Neftçi”, akademiyanın uşaqları, rəhbərlik yanımızda idi. Futbolçularım da, mən də hələ də bu oyunun ab-havasında qalmışıq. Birinci hissənin son saniyələrində Murad Məmmədovun qol epizodu oldu, onu vura bilsəydi, ikinci hissəyə 3:0 hesabıyla gedə bilərdik. Futbolçularım göstərdi ki, biz necə komandayıq. Əlbəttə, oyunun qırılma anı Ağadadaşın heç nədən qırmızı alması oldu. Bizim komandada nizam-intizam həmişə ilk planda olub. Rəqibə, azarkeşlərinə həmişə hörmət etmişik. Onun düşüncəsiz hərəkəti komandanı pis vəziyyətdə qoydu. Biz Ağadadaşı bir oyunluq götürmüşdük, kömək etsin deyə. Əsəblərini cilovlamadı. Ondan sonra istər-istəməz müdafiəyə oturduq. “Sabah” da təzyiqi artırdı. Hesabı bərabərləşdirdilər, bu da onlara sərf etdi. Mən futbolçularımla fəxr edirəm. Nə qədər belə gənclərimiz olsa, Azərbaycan futbolu qazanar. Əsas odu ki, belə futbolçular yetişdirməyi bacardıq”.