Mayın 27-ci Qəbələdə keçiriləcək kubokun final matçı ilə Azərbaydanda futbol mövsümü başa çatacaq.

Növbəti sayımızda bu oyuna ən müxtəlif yönlərdən yanaşacağıq. Hələlik yalnız hakim təyinatına toxunmaq istəyirəm.

Bir daha qeyd edim ki, oyunun baş hakimi FİFA referisi Elçin Məsiyev olacaq. Ona laysmanlar Pərvin Talıbovla Elşad Abdullayev yardım edəcək. Kamal Umudlu isə dördüncü hakim funksiyasını yerinə yetirəcək. Bəlkə də çoxları ölkə kubokunun finalının FİFA referisi Əliyar Ağayevə tapşırılacağını gözləyirdi. Hər halda, Ağayev azərbaycanlılar arasında beynəlxalq aləmdə ən yüksək kateqoriyaya malik referidi. 2013-cü ildən beynəlxalq oyunlara təyinat alan Əliyar hazırda FİFA referisi kimi birinci kateqoriyadadı. Elçin Məsiyev isə 2017-ci ildə hakimliyə başlayıb. FİFA refersisi loqosunu 2021-dən sinəsində gəzdirir. Ancaq nədənsə Hakim və Hakim-İnspektorlar Komitəsinin rəhbəri Frits Stuxlik həlledici qarşılaşmanı idarə etməyi daha təcrübəli Əliyara yox, Elçinə tapşırmağı lazım bilib. Özlüyümdə “ola bilsin, Elçin cari mövsümdə daha çox oyun idarə edib, daha çox bərkə-boşa düşüb” fikirləşdim. Dəqiqləşdirmək üçün başa çatan çempionatın protokollarını yenidən bir-bir nəzərdən keçirdim. Və məlum oldu ki, 30-cu çempionatda hakimlərin statistik göstəriciləri, demək olar, eynidi. Məsimov premyer-liqada 17 oyunda söz sahibi olubsa, Ağayev 16 qarşılaşmada baş hakim funksiyasını yerinə yetirib. Elçin 6 matçda 4-cü hakim funksiyasını yerinə yetiribsə, Əliyarda bu rəqəm 4-dü. Ancaq bir nüans var ki, onu yaddan çıxarmaq olmaz. Əliyar 2021/22 “futbol ili”ndə üç dəfə Yunanıstana ezam olunub. Sonuncu dəfə FİFA referisi mayın 1-də “Çempionluq” qrupunun 6-cı turu çərçivəsində keçirilən “Panatinaikos” - “Aris” oyununda ədaləti qoruyub. Statistikadan da göründüyü kimi, Ağayev Məsiyevdən daha təcrübəli, daha çox bərkə-boşa düşmüş ədalət təmsilçisidi. Yunanıstan çempionatında prinsipial qarşılaşmalara təyinat alması beynəlxalq dərəcəli hakimə güvəndən irəli gəlir. Bəs onda avstriyalı futbol funksioneri nədən “Qarabağ” – Zirə” finalını Ağayevə yox, Məsiyevə tapşırır? Yeri gəlmişkən, komitə sədri mövsümün son qarşılaşmasında hakim-inspektor funksiyasını yerinə yetirəcək. Olmaya deyilənlər düzdü, Stuxlikin Elçinə xüsusi simpatiyası var? Söylənilənlərə inansaq, avstriyalı funksioner Əliyarı komitənin sabiq rəhbəri Xaqani Məmmədovun kadrı kimi qəbul edir və burda işlədiyi üç ildə “mən də Məsiyevi yetişdirdim” demək istəyir ki, buna görə də mayın 27-də baş tutacaq matça baş hakim kimi Məsiyevi təyin edib. Belə yerdə deyiblər, aləmi bəzər, özü lüt gəzər. Belə çıxır ki, Yunanıstan superliqasında çempionluq uğrunda oynayan komandaların matçlarında yaşanan gərginlik Azərbaycan kubokunun finalında olmur. Belə çıxır ki, Azərbaycan futbolu səviyyəcə Yunanıstandan üstündü. Vallah, mən belə fikirləşmirəm. Stuxlik nə düşünür, niyə Məsiyevə güvənir – bunu demək çətindi.

Söhbət bacarıqdan, ad-sandan, kateqoriyadan gedirsə, birmənalı şəkildə Əliyar üstündü. Ağayev işə yaramasaydı, Yunanıstana göndərilməzdi. Yox, seçim üçün başqa meyarlar keçərlidisə, Stuxlik bunları açıqlasın, bu ölkənin futbolu ilə maraqlanan hər kəs də işini bilsin, sualların məngənəsində sıxılıb qalmasın. Kəsəsi, Məsiyev bu ölkədə 1 nömrəli referidisə, Yunanıstana da getməlidi. Yox, 1 nömrə Ağayevdisə, onda niyə kubokun finalına təyinat almır. İndi bu qadasını almadığım yunanlar birdən onları aldatdığımızdan, ölkənin 1 yox, 2 nömrəsini yardıma göndərdiyimizdən xəbər tutsalar, bizə nə deyərlər? Bu hoqqabazlıq yunanlara türklərin Konstantinopolu fəth etməsi qədər sarsıdıcı təsir göstərməzmi? Lap məsələnin bu tərəfi bir tərəfə, mən hələ öz sualına da cavab axtarıram: Stuxlik, yunanları barmağına sarıyıbsan, yoxsa bizi?

RƏŞAD