Avropa basketbolunun bir nömrəli klub turniri olan Avroliqada ''dördlər finalı''na start verildi.

Bu dəfə ''dördlər finalı''na Birləşmiş Ərəb Əmirliklərinin paytaxtı Əbu Dəbidə yerləşən ''Etihad Arena'' ev sahibliyi etdi. İlk yarımfinalda ''Fənərbaxça'' ilə turnirin son qalibi statusunda olan ''Panatinaikos'' üz-üzə gəldi.

Oyuna çox yaxşı başlayan və ilk 4 dəqiqəyə 8 xallıq üstünlük (13:5) yaxalayan İstanbul nəhəngi kiçik fasiləyə 22:13 öndə yollandı. İkinci çeyrəyə Hayes-Devis və Tarık Biberoviçin 3 xallıqları ilə başlayan ''Fənər'' 13-cü dəqiqəni 31:18 öndə tamamladı. Amma sonrakı dəqiqələrdə komandanın tempi bir qədər aşağı düşdü. Yunanıstan nəhəngi fərqi azaltmağa müvəffəq olsa da, ''Fənər'' böyük fasiləyə 38:33 öndə yollandı.

Fasilədən sonra hər iki komanda xal toplamaqda çətinlik çəkdi. Amma ''sarı-lacivərdlilər'' Makkollumun sayəsində yenidən fəallaşdılar. Şarunas Yasekyaviçyusun komandası son çeyrəyə 53:45 öndə daxil oldu. Sona 5 dəqiqə qalmış ''Pana''nın lideri Kendrick Nannın 5-ci qayda pozuntusuna yol verərək meydanı tərk etmək məcburiyyətində qalması da öz təsirini göstərdi. Yunanların türkiyəli ulduzu Cedi Osman isə 22 xal toplasa da, bu, qələbə üçün yetərli olmadı. Həm yaxşı müdafiə olunan, həm də hücumda inamlı təsir bağışlayan ''Fənər'' ötən ilki səhvləri təkrarlamadı.

Bu komandalar ötən il də yarımfinalda qarşılaşmış və yunanlar inamlı qələbə qazanmışdı. Bu dəfə isə ''Fənər'' 82:76 hesabı ilə qalib gələrək 2018-dən bu yana ilk dəfə, tarixində 4-cü dəfə Avroliqanın finalına yüksəldi! ''Fənər'' daha öncə 2016, 2017, 2018-ci illərdə finalda oynamış və yalnız 2017-də bu turniri qazana bilmişdk. Avroliqaya damğa vuran mütəxəssislərdən olan Ərgin Ataman bu dəfə finala həsrət qaldı. Ünlü türkiyəli mütəxəssis daha öncə 2019, 2021 və 2022-də ''Anadolu Efes'', 2024-də ''Panatinaikos''un başında bu turnirin qalibi olmuşdu.

Digər yarımfinalda da favorit sayılan komanda məğlub oldu. Yunanıstanın digər nəhəngi ''Olimpiakos'' ''Monako''ya 68:78 hesabı ilə uduzdu. Moneqasklılar tarixdə ilk dəfə bu turnirin finalına vəsiqə qazandılar.

Beləliklə, mayın 25-də 3-cülük matçında ''Panatinaikos'' ilə ''Olimpiakos'', finalda isə ''Fənərbaxça'' ilə ''Monako'' qarşılaşacaq.