Son iki gündə Avroliqada 5-ci turun oyunları keçirildi. Mövsümə fırtına kimi başlayan və ardıcıl 4 oyunda qələbə qazanan “Fənərbaxça” dünən “Efes”in qonağı oldu. “Sarı-lacivərdlilər” həmvətənləri ilə oyunda da qələbə seriyasını davam etdirdi.

Bu arada Avroliqanın cari mövsümdəki “Dördlər finalı”nın Dubayda keçirilə biləcəyi haqda xəbərlər yayılmaqdadı. Şəhər əvvəllər də həlledici mərhələnin təşkilatçılığına namizəd kimi gözdən keçirilirdi, ancaq elə bu il qitənin ən güclü basketbol klublarını qəbul edə bilər. İş ondadı ki, “Dördlər finalı”nın təşkilatçılığına əsas iddialı Kaunas ciddi maliyyə problemləri ilə üzləşib. “Jalgiris”in baş meneceri Paulyus Moteyunasın dediyinə görə, Litva hökuməti turnirin bu şəhərdə keçirilməsi üçün lazım olan 1 milyon avronu ayırmaqdan boyun qaçırıb. Dubayda isə 17 min yerlik, MBA səviyyəsinə uyğun olan möhtəşəm arena var.

Avroliqanın sabiq prezidenti Xordi Bartomeu da bu ideya ilə bağlı danışıb. Onun dediyinə görə, vaxtilə Dubayla mümkün əməkdaşlıqla bağlı danışıqları məhz özü aparıb: “Dördlər finalı”nın Dubayda keçirilməsi yeni prezidentin yeni ideyası deyil. Bunun mümkünlüyü ilə bağlı hələ fevralda danışmağa başladım. Turnirin Dubayda təşkili Avropa basketbolunun gələcəyini dəyişə bilər. Avropadakı ehtiyatlarımızı artırmayacağıq, Dubayda isə təbii artım üçün imkanlarımız var. Biznesimizi genişləndirmək və yaxşılaşdırmaq istəyiriksə, yeni bazarlara çıxmalıyıq. Bəzi belə bazarlarda hələ də güclü deyilik”.
Xatırladaq ki, Avroliqanın yaradıcısı Bartomeu 22 illik prezidentlikdən sonra bu ilin sentyabrında postundan gedib, onu Deyan Bodiroqa əvəz edib.