“İlin əvvəlindən planlandırılan formada region klublarına dəstəyimiz davam edir. Yuxarı liqaya yüksələn və aşağı liqaya düşən region klublarının olduğunu nəzərə alaraq, onlara dəstək göstərməli olduğumuz sahələr olduğunu düşünürəm. Bununla yanaşı, AFFA-nın strategiyasına uyğun olaraq, klubların bilik və bacarıqlarının artırılması, məhsul formalaşdırılması və gəlirlərin artırılması mövzularında FİF-in fəaliyyəti ilə bağlı AFFA rəhbərliyi ilə müzakirələrimiz davam edir. Bu müzakirələrin nəticəsi FİF-in fəaliyyətinə təsir edəcək. Ümumilikdə hədəfin dayanıqlılıq olduğunu nəzərə alsaq, bütün klubların dəstəyə ehtiyacı var. "Oyun günü" məhsulunun inkişafı və gəlirlərin diversifikasiyası sahəsində işlərimizə davam edəcəyik. Premyer-liqa klublarından yalnız "Şamaxı"nın sponsorsuz olduğunu nəzərə alaraq, bu klubu prioritet hesab etmək olar. Bununla yanaşı, digər sponsorsuz region klublarını da nəzərdə saxlayacağıq. Hər il klub futbolunda özəl sektor nümayəndələrinin sayının artması sevindirici haldı. Bununla yanaşı, hər il əvvəlki ilə nisbətən qiymət artımı, inflyasiya müşahidə olunur. Klubların meydanda rəqabəti büdcənin əsas komandaya xərclənməsi ilə nəticələnir. Klubların əsas büdcəsinin dövlət dəstəyindən təşkil olunduğunu nəzərə alaraq, çıxış yolu klublara investorların cəlb olunması və mümkün qədər çox gəlir kanalının formalaşdırılmasıdı”.