"Araz-Naxçıvan" avrokubok matçlarını harda keçirəcək? - "ASK Arena" və növbəti mövsüm ilə bağlı açıqlama
Məlum olduğu kimi, Misli premyer-liqasının 35-ci tur matçında "Şamaxı"nın meydanında qələbə qazanan "Araz-Naxçıvan" mövsümü 3-cü pillədə bitirəcəyini rəsmiləşdirdi.
Bu o deməkdi ki, Muxtar Respublika təmsilçisi ölkəmizi Konfrans Liqasında təmsil edəcək. Ancaq hər şey bununla bitmir.
Komandanın avrokubok matçlarını harda keçirəcəyi bəlli deyil. Həmçinin "qırmızı-ağlar"ın növbəti mövsümdə ev oyunlarını keçirəcəyi stadionla bağlı məsələ də açıq qalıb. Hərçənd bəzi həmkarlarımız komandanın "ASK Arena"ya göz qoyduğunu iddia edir.
Qeyd olunanlarla bağlı "Araz-Naxçıvan"ın mətbuat xidmətinin rəhbəri Mahal Məmmədova müraciət etdik. Onun "Football-plus.az"a cavabı:
"Avrokubok oyunlarını "Liv Bona Dea Arena"da keçirəcəyik. Ancaq növbəti mövsümlə bağlı plan qurmaq üçün cari "futbol ili"nin sona çatmasını gözləyirik. "ASK Arena" isə gündəmimizdə yoxdu. Həqiqətəuyğun məlumat deyil. Ümumiyyətlə, bu stadionun qazonu bərbad durumdadı, premyer-liqanın tələblərinə cavab vermir".
KƏNAN BAHADIR
Digər xəbərlər
