“Qarabağ” Misli premyer-liqasının 35-ci turunda “Kəpəz”i məğlub etdi - 3:0.

"Football-plus.az" xəbər verir ki, "köhlən atlar"ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavabladı.

- Futbolçularıma təşəkkür edirəm. Çox faydalı, keyfiyyətli oyun oldu. Biz bir neçə tur əvvəl çempion olsaq da, bu gün bunu daha çox hiss etdik. Haqq etdikləri medallara bu gün qovuşacaqlar. Bizim üçün çox xoş gündü. Futbolçularımı ürəkdən təbrik edirəm. Stadiona gələn hər azarkeşə təşəkkür edirəm. Azər Bağırova və "Kəpəz"ə uğurlar arzulayıram.

- Müdafiənin solunda Nəriman oynadı. Səbəb nə idi?
- 6-7 yığma üzvünə istirahət vermişdim. Məşqlərdən də onları azad etmişdim. Çünki onlar milliyə yollanacaqlar. Həm azərbaycanlılar, həm də legionerlər var. Sistemdə bir az dəyişiklik etmişdim. Nərimana sol hücumçu kimi də tapşırıq verilmişdi. Bəzən müdafiəyə kömək edirdi.

- Legioner limiti yığışdırılandan sonra daha çox legionerlərə şans verəcəyinizi gözləmək olardı. Amma bu gün gənc oyunçuya da şans verdiz. "Qarabağ" gənc, perspektivli oyunçulardan əl çəkməyəcək?
- Biz həmişə bacarıqlı yerli oyunçulara şans vermişik. Yaxşıdırsa, meydana buraxırıq. İstənilən futbolçu üçün şərait yaradılır ki, əsas komandada məşq etsin, oynasın. Hikmət Cəbrayılzadə son 10 gündə əsas komandadadı. Aftandil Hacıyev o və Amin Rzayev haqqında məlumat vermişdi. Biz şərait yaradırıq - fərqi yoxdu legioner limiti olacaq, ya yox. Çox istəyərdim ki, meydandakı dəqiqələri daha çox olsun. Son vaxtlarda bəlkə bizdə çətin olar. Çempionuq, lider komandayıq, bizdən tələblər də çoxdu. Rotasiya etməyə vaxtımız olmur. O da ayrıca fəlsəfədir. İllər əvvəl belə hallar olub. Nəticədən asılı olmayaraq, yerlilərə üstünlük vermişik, avrokuboklarda 10 azərbaycanlı ilə oynamışıq. Özümüz də, Azərbaycan futbolu da bunun faydasını görüb. Biz daim onları möhkəmləndirməyə çalışırıq. Böyük futbol oynamaq üçün daha dözümlü olmalıdırlar. Şərait yaradacağıq. Hikmətə ona güvənimiz olduğunu göstərdik. Öz üzərində çox çalışmalıdı. Fiziki gücünü və faydalı iş əmsalını artırmalıdı. Belə uşaqlar görəndə, həm sevinirəm, həm də məyus oluram. Onlara daha çox şərait yarada bilmirəm. Bəzən fikirləşirəm ki, hər şeyi kənara qoyub gənclərlə çalışasan. Ancaq bəzi məsuliyyətlər var. İmkan olduqca belə oyunçulara şans verəcəyik.

- "Qarabağ"ın illik maliyyə hesabat açıqlandı. Sponsor tərəfindən ayrılan məbləğ sanki az görünürdü. Sizcə, belə deyil?
- Orda elə görünür. Amma ümumən gələn pullar hamısı "Azərsun"un, klubun pullarıdı. Avrokuboklardan 10 milyon yox, 5 milyon gəlsə də, lazım olanda sponsordan götürürük. Təkcə Avropadan gələn pul yoxdu, futbolçu satışından da pul gəlir. Lazım olduqca sponsorlarla dil tapacağıq.

- Juninyo komandasında çox uğursuzdu. “Qarabağ” çox vaxt satdığı futbolçuları geri qaytarıb. Juninyonu icarəyə götürmək istəyərsiz?
- Hələ ki belə məlumat və söhbət yoxdu. Buradan gedən futbolçu olsa belə, bizə faydalı olacaqsa, onun geri qayıtmasına “yox” deməmişik. Juninyonun "Flamenqo"da işi bu gün yaxşı getmirsə, bu o demək deyil ki, belə davam edəcək. Onunla son dəfə zədə aldığı vaxt danışmışdıq. Oyunlarını izləyirəm. "Flamenqo" böyük klubdu. Juninyo ilə danışığımız olmayıb.

- Bu mövsüm yaddaqalan nə oldu?
- Çempionluğumuzun üzərinə bir çempionluq da gəldi. Avrokuboklarda bu ilimiz uğursuz sayılır, çox fikirlər söylənilirdi. Amma çempionatda yerimizi qoruya bildik. Bəzi səhvlərimiz, formadan geridə qaldığımız vaxtlar oldu. Bəzi futbolçularla dialoq hesabına komandanı ələ ala bildik. Çempionat və kubokda qaldıq. Hər çempionluq bizim üçün yaddaqalandı. Xeyli rotasiyalar etdik.

- İcarədə olan futbolçulardan kimsə geri qayıdacaq?
- Bu barədə futbolçular və klublar ilə danışmamışıq. Mövsümün sonunda bu barədə məlumat veriləcək.

- Çempionatımızın səviyyəsi yüksəlib, yoxsa aşağı düşüb?
- Biz heç vaxt aşağı düşməsi barədə düşünmürük. İldən-ilə insan amili dəyişir, elm inkişaf edir. Ayrı-ayrılıqda fərdi planda bəzi futbolçuların səviyyəsi aşağı düşürsə, iş rejimi artır. Çox nadir oyunlar olub ki, rahat qələbə qazanmışıq. Hər oyunda çətinlik var. Düşünmürəm ki, çempionatın səviyyəsi aşağı düşüb. Premyer-lLiqanın oyunlarının keyfiyyəti süni örtüklü meydanlarda aşağı düşür. Özü də, günorta saatlarında oynayırıqsa... Yerli məşqçilər nə qədər inkişaf edib. Oyunlarda hiss edirəm. Bizə qarşı sistemlər təşkil edirlər, bizi əks-hücumlarda tuturlar. Bu mövsüm mənim üçün faydalı oldu. Hər bir məşqçinin, komandanın irəliləyişini görürəm, nəinki əksini.

MÜZƏFFƏR QULUZADƏ