7 qol və …“Barsa” finala həsrət qaldı - İCMAL
Mayın 6-7-də Çempionlar Liqasında yarımfinalın cavab oyunları keçirildi.
Səfərdən sərfəli nəticə ilə qayıdan “İnter” və PSJ evdə büdrəmədi. “İnter” tarixində 7-ci, PSJ isə 2-ci dəfə qitənin ən nüfuzlu klub turnirinin finalında oynacaq. Onu da xatırladaq ki, həlledici oyun mayın 31-də Münhendəki “Alyans Arena”da keçiriləcək.
yarımfinal, cavab oyunu
İnter – Barselona 4:3 (2:0, 1:3, 1:0), əlavə vaxtda
İnter (Milan, İtaliya): Zommer, Dumfris (De Vrey, 108), Bissek (Darmian, 71), Açerbi, Bastoni, Di Marko (Karlos Auqusto, 55), Barella, Çalxanoğlu (Zelinski, 79), Mxitaryan (Frattezi, 79), L.Martines (Taremi, 71), Türam.
Barselona (İspaniya): Şensnı, E.Qarsiya (Fort, 98), Kubarsi (Qavi, 105), Martines (Arauxo, 76), Martin, De Yonq, Pedri (Viktor, 105), Yamal, Olmo (Lopes, 83), Rafinya, Torres (Levandovski, 90+1).
Qollar: L.Martines, 21 (1:0). Çalxanoğlu, 45+1-p. (2:0). E.Qarsiya, 54 (2:1). Olmo, 60 (2:2). Rafinya, 87 (3:3). Açerbi, 90+3 (3:3). Frattezi, 99 (4:3).
Vərəqələr: Çalxanoğlu, 36. Martines, 51. Mxitaryan, 68. Açerbi, 90+4. Viktor, 90+5 (meydandan kənarda). Auqusto, 91. Bastoni, 118 – sarı.
Hakim: Şimon Marçinyak (Polşa).
6 may. Milan. 75504 tamaşaçı.
İlk oyun – 3:3.
Gözləntilərin əksinə, cavab oyunu da məhsuldar alındı. Bu dəfə komandalar birlikdə 7 qol vurdu, bəxt daha təcrübəli milanlıların üzünə güldü. 21-ci dəqiqədə hesabı açan Lautaro Martines hissənin sonunda penalti də qazandı. “Barsa” 2-ci hissənin əvvəlində qısa zaman kəsiyində iki qol vurmaqla “status-kvo”nu bərpa etdi. Sona üç dəqiqə qalmış Rafonya qonaqları irəli çıxardı. Amma uzatma dəqiqələrində hücuma atılan “İnter” məğlubiyyətdən qurtulmağı bacardı. Əlavə vaxtdakı ilk qol vəziyyəti də milanlıların hesabına yazıldı – Türamla Tareminin qoşulduğu hücumu Frattezi bitirdi. Sona qədər müdafiə olunan “İnter” Zommerin də qəhrəmanlığı sayəsində finala adladı.
Oyundan sonra
Hans-Diter Flik, “Barselona”nın baş məşqçisi:
“Futbolçularım mümkün olan hər şeyi etdi. Təəssüf ki, mübarizəni dayandırdıq. “İnter” də güclü komandadı, tərifi haqq edir. Oyunda bir neçə mübahisəli vəziyyət yarandı və hər dəfə də “İnter”in xeyrinə qərar verildi. Futbol belədi, qəbul etmək lazımdı. Əlbəttə, hakimlərin qərarları haqda düşünürəm, ancaq publika önündə bu haqda danışmaq niyyətim yoxdu. Onun haqqında düşündüklərimi özünə dedim”.
Simone İnzaqi, “İnter”in baş məşqçisi:
“İlk növbədə “Barselona” – yüksək səviyyəli komandanı təbrik etmək istəyirəm. Uşaqlar imkanlarının son həddində oynadılar. Əlbəttə, çətinliklərimiz oldu, ancaq bütün bunların öhdəsindən gəldik. Bu uşaqlar əməyi və inadkarlığı ilə finalı haqq edir”.
Faktlar
* “San-Siro”ya 75504 azarkeş (4253-ü qonaq sektorunda) toplaşmışdı ki, nəticədə bilet satışından 14,7 milyon avro əldə olundu. Bu, İtaliyada keçirilən oyunlar üçün rekorddu.
* Lautaro Martines ÇL-in bir mövsümündə qol sayına görə “İnter”in klub rekordunu təkrarladı. Argentinalı 2024/25 mövsümündə artıq 9 qol vurub. Əvvəllər (2002/03 mövsümündə) onun həmvətəni Ernan Krespo “İnter”in heyətində belə uğurla yadda qalıb.
* ÇL-in cari mövsümündə 24 qol buraxan “Barsa” özü üçün yeni antirekord müəyyənləşdirdi. Kataloniyalılar 1999/2000 mövsümündə 23, 2001/02 mövsümündə 20 qol buraxmışdı.
* “İnter” cari ÇL mövsümündə keçirdiyi 14 oyunun yalnız birində uduzub ki, bu da turnirin yeni rekordudu. Milanlılar yalnız əsas mərhələnin 6-cı turunda “Bayer-04” önündə “ağ bayraq qaldırıb” (0:1).
* Komandalar iki oyunda 13 qol vurdu. Bu isə ÇL-in yarımfinal mərhələsi üçün ən yaxşı nəticədi. 2017/18 mövsümündə “Liverpul” da “Roma”nı iki oyunun nəticəsinə görə məhz 7:6 hesabıyla (5:2, 2:4) məğlub etmişdi.
* “İnter” əvvəlki 6 final oyunun üçündə qalib gəlib: milanlılar 1964-cü ildə “Real”ı (3:1), 1965-ci ildə “Benfika”nı (1:0), 2010-cu ildə isə “Bavariya”nı (2:0) məğlub edib. “İnter” 1967-ci ildə “Seltik” (1:2), 1972-ci ildə “Ayaks” (0:2), 2023-cü ildə “Mançester Siti” (0:1) ilə bacarmayıb.
Digər xəbərlər
