Türkiyəli məşqçinin komandası əzmkar qələbə qazandı, klub rəsmisi döyüldü!
İran çempionatının 29-cu turunda İsmayıl Kartalın çalışdırdığı ''Persepolis'' ''Xeybər''in qonağı olub.
Xatırladaq ki, İranda çempion artıq bəllidi. Təbriz təmsilçisi ''Traktor'' bu mövsüm tarixinin ilk çempionluğunu qazanıb. Asiya Çempionlar Liqasının təsnifat mərhələsinə vəsiqə verən 2-ci pillə uğrunda mübarizə aparan ''Persepolis'' isə çox mühüm qələbə qazanıb. Türkiyəli məşqçinin komandası Xorramabad şəhərində fasiləyə 0:1 geridə yollansa da, ikinci hissədə vurduğu qollarla 2:1 hesablı əzmkar qələbə qazanıb. Son 4 oyunda 3-cü qələbəsini qazanan Tehran təmsilçisi xal baxımından 2-ci pillədəki ''Sepahan''ı yaxalayıb.
''Sepahan'' bu həftə də xal itirdi. İndi hər iki klubun aktivində son turda öncə 57 xal var. ''Persepolis'' son turda ''Havadar''ı, ''Sepahan'' isə ''İstiqlal''ı qəbul edəcək. Bu arada Xorramabaddakı oyun qalmaqalla müşayiət olunub. Kartal matçın ardından keçirilən mətbuat konfransında bununla bağlı ciddi iradlarını dilə gətirib. O, hətta ''Persepolis'' rəsmisinin döyüldüyünü də bildirib:
''Xeybar''in bir rəsmisi bizim klubun direktoru Afşin Pirovaniyə yumruq atdı və gözüne zərbə vurdu. Belə şeylər futbolun ruhuna ziddi. Əslində başımıza belə olayların gələcəyi hələ dünəndən bəlli idi. Burda otelə yollanarkən forvardımız Əli Əlipura elə söyüşlər söyüldü ki, bunu burda dilimə gətirə bilmərəm. Eləcə də bütün komandanı təhqir etdilər. Elə oyundan öncə də komandamız meydana çıxanda söyüşlər eşidildi. Tribunadan daş atanlar oldu. Yəni bura ayaq basdığımız ilk andan özümüzə qarşı düşmən münasibət hiss etməyə başladıq. Mən Xorramabad şəhərində yaşayanların bu cür insanlar olduğunu düşünmürəm. Bəzilərinin etdiyini bütün şəhərə aid etmək düzgün deyil. Futbolda qalib gəlmək də var, məğlub olmaq da. Amma nə olursa olsun, bir-birimizə hörmət etməliyik. Hörmətin olmadığı yerdə nə xoşbəxtlik olar, nə də haqq-ədalət''.
Digər xəbərlər
