“Nürnberq” Almaniyanın 2-ci bundesliqasında keçirdiyi 32-ci tur matçında da qələbəyə həsrət qaldı. Mahir Emrelinin komandası evdə “Elversberq”ə uduzmaqla (1:3) ardıcıl üçüncü matçda xal itirdi.

Təbii ki, indi bu komandanın 1-ci bundesliqaya yüksəlməsi qeyri-mümkün görünür. Lakin həmyerlimizin həmin çempionatda çıxış edən iki klubdan təklif aldığını bəllidi. Belədə hücumçunun performansıyla bağlı bəzi detallardan bəhs etməkdə fayda var. Hər halda, Mahir irəliləyişə nail olmaq istəyirsə, xal itkiləri onu ruhdan salmamalı, özünü yaxşı tərəfdən göstərməyə davam etməlidi. Göstəricilərə gəlincə...

“Football-plus.az” “Kicker”ə istinadla xəbər verir ki, sonuncu matçda 90 dəqiqə oynayan futbolçunun qapıya üç zərbəsinin hamısı qeyri-dəqiq olub. Mahir oyun ərzində 10,8 km məsafə qət edib. O, hava duellərinin 67, təkbətək mübarizələrin 36 faizindən qalib ayrılıb. Emreli bu matçda iki qayda pozuntusuna yol verib. Bir dəfə uğurlu driblinqə imza atan hücumçunun ən yüksək qaçış sürəti saatda 31 km-yə çatıb. “Kicker” bu göstəricilərə əsasən, futbolçunu 5 ballıq sistemlə 2,5 bal ilə qiymətləndirib.

KƏNAN BAHADIR